काठमाडौं– इटली सरकारले विद्यालयमा बुर्का र नकाब लगाएर अनुहार पूर्ण रूपमा ढाक्न प्रतिबन्ध लगाउने तयारी गरेको छ। प्रधानमन्त्री जर्जिया मेलोनीले आइतबार यससम्बन्धी प्रस्तावमा मन्त्रिपरिषद्ले चाँडै निर्णय गर्ने बताएकी छन्।
मेलोनीका अनुसार विद्यालयमा विद्यार्थीको अनुहार स्पष्ट देखिनुपर्नेछ। कुनै पनि व्यक्तिलाई परम्परा वा संस्कृतिको नाममा अनुहार ढाक्न दबाब दिन नहुने उनको भनाइ छ।
उनले विद्यालयमा विदेशी विद्यार्थीको एकीकरणलाई सहज बनाउने उद्देश्यले अर्को व्यवस्था पनि प्रस्तावित रहेको बताएकी छन्। प्रस्तावअनुसार इटलीको शिक्षा प्रणालीमा घुलमिल हुन कठिनाइ भइरहेका विदेशी विद्यार्थीका अभिभावकले इटालियन भाषा सिक्नुपर्ने व्यवस्था गर्न लागिएको छ।
१९७५ कै कानुनमाथि थप कडाइको तयारी
इटलीमा सार्वजनिक स्थानमा पहिचान खुल्न नसक्ने गरी अनुहार ढाक्ने विषयमा सन् १९७५ देखि नै कानुनी व्यवस्था छ। उक्त कानुनले सार्वजनिक स्थानमा व्यक्तिको पहिचान लुक्ने गरी अनुहार ढाक्न रोक लगाएको छ। यद्यपि, निश्चित परिस्थितिमा त्यसबाट छुट दिन सकिने व्यवस्था पनि छ।
सन् २००८ मा अदालतले धार्मिक वा सांस्कृतिक कारणले अनुहार ढाक्दैमा मात्र सम्बन्धित व्यक्तिलाई कानुन उल्लंघन गरेको मान्न नहुने फैसला गरेको थियो। त्यस्तो अवस्थामा घटनाको परिस्थिति हेर्नुपर्ने अदालतको भनाइ थियो।
अब मेलोनी सरकारले भने विद्यालयलाई लक्षित गर्दै बुर्का र नकाबमाथि छुट्टै प्रतिबन्धको व्यवस्था गर्न खोजेको हो। मन्त्रिपरिषद्बाट प्रस्ताव स्वीकृत भएपछि त्यसलाई कानुन बनाउन संसद्मा पठाइनेछ। प्रस्ताव संसद्मा पुगेपछि ६० दिनभित्र त्यसलाई अनुमोदन गर्नुपर्ने व्यवस्था प्रस्तावित छ।
आप्रवासन नीतिमा थप कडाइको बहस
इटलीमा आप्रवासन लामो समयदेखि राजनीतिक बहसको प्रमुख विषय रहँदै आएको छ। सन् २०२७ मा आमनिर्वाचन हुँदैछ।
मेलोनी नेतृत्वको ब्रदर्स अफ इटली (FdI) सरकारमाथि आप्रवासनसम्बन्धी नीतिमा थप कडाइ गर्न दबाब पनि देखिएको छ। यही क्रममा नेसनल फ्युचर (FN) ले यस वर्ष जुलाईमै विद्यालयमा बुर्का र नकाब प्रतिबन्ध गर्न माग गरेको थियो।
FN का नेता रोबर्टो वन्नाची इटलीका पूर्व सेना जनरल हुन्। उनले सन् २०२६ मा उक्त पार्टी स्थापना गरेका हुन्। पार्टीले मेलोनीको दलभन्दा पनि कडा आप्रवासन नीति आवश्यक रहेको बताउँदै आएको छ।
फ्रान्स र बेल्जियममा पनि सार्वजनिक स्थानमा प्रतिबन्ध
इटलीमा विद्यालयमा बुर्का–नकाबमाथि प्रस्तावित प्रतिबन्ध युरोपमा पहिलो भने होइन। फ्रान्स र बेल्जियमसहित विभिन्न देशले सार्वजनिक स्थानमा अनुहार पूर्ण रूपमा ढाक्ने कपडामाथि विभिन्न प्रकारका प्रतिबन्ध लगाएका छन्।
युरोपियन कोर्ट अफ ह्युमन राइट्सले फ्रान्स र बेल्जियममा सार्वजनिक स्थानमा बुर्का तथा नकाबमाथि लगाइएको प्रतिबन्धलाई पनि कायम राखेको छ। फ्रान्ससम्बन्धी सन् २०१४ र बेल्जियमसम्बन्धी सन् २०१७ को फैसलामा अदालतले सामाजिक अन्तरक्रिया कायम राख्नुपर्ने आधारलाई प्रतिबन्धसँग जोडेको थियो।
यद्यपि, मानवअधिकारसम्बन्धी विभिन्न संस्था र संयुक्त राष्ट्रसंघले यस्ता प्रतिबन्धको विरोध गर्दै आएका छन्।
इटलीका विद्यालयमा ९ लाखभन्दा बढी विदेशी नागरिकता भएका विद्यार्थी
रिसर्च इन्स्टिच्युट फोन्डाजियोने ISMU का अनुसार इटलीका विद्यालयमा करिब ९ लाख ३० हजार विदेशी नागरिकता भएका विद्यार्थी अध्ययनरत छन्। अर्थात् विद्यालयमा अध्ययन गर्ने प्रत्येक १०० विद्यार्थिमध्ये करिब १२ जना विदेशी नागरिकता भएका विद्यार्थी छन्।
तर पछिल्लो एक दशकमा इटलीमा विदेशी नागरिकता भएका नाबालिगको कुल संख्या करिब ४.५ प्रतिशत घटेको तथ्यांकले देखाउँछ।
मेलोनी सरकारले विद्यालयमा बुर्का–नकाब प्रतिबन्ध र विदेशी विद्यार्थीका अभिभावकलाई भाषा सिकाउने प्रस्तावलाई विद्यालयमा सामाजिक एकीकरण तथा इटलीको शिक्षा प्रणालीसँग विदेशी परिवारको सम्बन्ध बलियो बनाउने नीतिसँग जोडेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
