काठमाडौं– रुसमा संसदीय निर्वाचनको अन्तिम दिन चलिरहेका बेला युक्रेनले रातभर एक हजारभन्दा बढी ड्रोन प्रहार गरेको रुसी अधिकारीहरूले बताएका छन्। तीमध्ये सयौं ड्रोन राजधानी मस्कोतर्फ लक्षित रहेको उनीहरूको दाबी छ।
मस्कोका मेयर सर्गेई सोब्यानिनले राजधानीमाथिको आक्रमणलाई अहिलेसम्मकै ठूलो ड्रोन आक्रमण भएको बताएका छन्। उनका अनुसार आक्रमणका क्रममा मस्को तेल प्रशोधन केन्द्र र एउटा आवासीय भवनमा क्षति पुगेको छ।
मस्को वरपरको क्षेत्रमा भएको आक्रमणमा दुई जनाको मृत्यु भएको र २० जना घाइते भएको स्थानीय गभर्नर आन्द्रे भोरोब्योभले बताएका छन्। मृत्यु हुनेमा ७४ वर्षीय पुरुष र ४४ वर्षीया महिला रहेको उनले बताएका छन्। पछिल्ला रिपोर्टमा मृतकको संख्या तीन पुगेको पनि रुसी अधिकारीहरूले बताएका छन्।
रुसको रक्षा मन्त्रालयले देशभर, क्रिमिया र ब्ल्याक सी क्षेत्रमा गरी १ हजार ११० युक्रेनी ड्रोन खसालेको दाबी गरेको छ। सोब्यानिनका अनुसार मस्कोतर्फ आउँदै गरेका ४५० ड्रोन नष्ट गरिएको थियो।
रुसले युक्रेनमा आक्रमण सुरु गरेको चार वर्षभन्दा बढी समयपछि युक्रेनले लामो दूरीमा प्रहार गर्न सक्ने स्वदेशमै निर्मित ड्रोन प्रविधिको व्यापक प्रयोग गर्दै आएको छ। पछिल्लो आक्रमणमा पनि युक्रेनले तेल तथा रसदसम्बन्धी पूर्वाधारलाई लक्षित गरेको बताइएको छ।
युक्रेनी राष्ट्रपति भोलोदिमिर जेलेन्स्कीले सामाजिक सञ्जालमार्फत युक्रेनले विभिन्न क्षेप्यास्त्र र ड्रोन प्रयोग गरेको बताएका छन्। उनका अनुसार आक्रमणमा स्वदेशमै निर्मित ‘फ्लेमिङ्गो’ र ‘पेलिकन’ क्षेप्यास्त्र पनि प्रयोग गरिएको थियो। उनले तेल तथा रसद केन्द्रलाई लक्षित गर्नुको उद्देश्य रुसको युद्ध सञ्चालनलाई आर्थिक दबाबमा पार्नु रहेको बताएका छन्।
जेलेन्स्कीले भनेका छन्,‘यी अर्बौं डलर हुन्, जसले युद्धयन्त्रलाई निरन्तरता दिन्छन्।’ यता, रुसले पनि युक्रेनमाथि आक्रमण जारी राखेको छ। जेलेन्स्कीका अनुसार शनिबार खेरसन क्षेत्रमा रुसी ड्रोन आक्रमणमा एक धर्मगुरुको मृत्यु भएको र चार जना घाइते भएका थिए।
शनिबार साँझ युक्रेनी राजधानीमा भएको रुसी आक्रमणमा दुई बालबालिका र उनीहरूकी आमाको मृत्यु भएको किभ क्षेत्रीय राज्य प्रशासनका प्रमुख तिमुर तकाचेन्कोले बताएका छन्। उनका अनुसार सोही आक्रमणमा घाइते भएका अर्का बालकको पनि आइतबार अस्पतालमा मृत्यु भएको थियो।
यसैबीच, जेलेन्स्कीले आइतबार अमेरिकी राष्ट्रपति डोनाल्ड ट्रम्पसँग कुराकानी भएको बताएका छन्। सामाजिक सञ्जाल एक्समा उनले अर्को साता न्युयोर्कमा हुने संयुक्त राष्ट्रसंघको महासभाका क्रममा आफू र ट्रम्पबीच भेट हुने सहमति भएको उल्लेख गरेका छन्।
निर्वाचनको अन्तिम दिन आक्रमण
युक्रेनको ड्रोन आक्रमण रुसको तीनदिने संसदीय निर्वाचनको अन्तिम दिन भएको हो। निर्वाचनमा राष्ट्रपति भ्लादिमिर पुटिनका नीतिको विपक्षमा रहेको राजनीतिक प्रतिस्पर्धा सीमित रहेको भन्दै अन्तर्राष्ट्रिय सञ्चारमाध्यमले यसको प्रकृतिमाथि प्रश्न उठाएका छन्।
रुसले युद्धपछि आफूले कब्जा गरेको युक्रेनका चार क्षेत्रमा तथा सन् २०१४ मा कब्जा गरेको क्रिमियामा पनि निर्वाचन गराएको छ। युक्रेनले ती क्षेत्रमा निर्वाचन गराउने रुसी कदमलाई अवैध भन्दै आएको छ।
रुसको केन्द्रीय निर्वाचन आयोगका अनुसार युक्रेनको नियन्त्रणबाहिर रहेको खेरसन क्षेत्रको एक भागमा भएको आक्रमणमा स्थानीय निर्वाचन समितिका एक सदस्यको मृत्यु भएको छ।
मस्कोका मेयर सोब्यानिनले आक्रमण निर्वाचनमा अवरोध पुर्याउने उद्देश्यले गरिएको आरोप लगाएका छन्। उनले भनेका छन्,‘यो आक्रमण निर्वाचनमा अवरोध पुर्याउने उद्देश्यले स्पष्ट रूपमा योजना गरिएको थियो। शत्रु यस मामिलामा असफल भयो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
