काठमाडौं– सिराहामा भएको गोलीकाण्डको छानबिन समितिले प्रमुख जिल्ला अधिकारी सुरेन्द्र पौडेलसमेतलाई दोषी ठहर गर्दै कारबाहीका लागि सिफारिस गरेपछि गृह मन्त्रालयले उनलाई काठमाडौं तानेको छ।
छानबिन समितिले घटनामा पौडेलको भूमिकामाथि समेत प्रश्न उठाउँदै कारबाहीको सिफारिस गरेपछि गृह मन्त्रालयले उनलाई सिराहाबाट फिर्ता बोलाएको हो। मन्त्रालय तानिए पनि पौडेललाई तत्काल कुनै जिम्मेवारी भने दिइएको छैन।
गृह मन्त्रालय स्रोतका अनुसार पौडेललाई मन्त्रालयमा हाजिर गराएर थप निर्णय गर्ने तयारी भइरहेको छ। उनलाई जिम्मेवारी नदिई मन्त्रालयमा राखिएको हो।
पौडेललाई फिर्ता बोलाएसँगै गृह मन्त्रालयले सिराहामा नयाँ प्रमुख जिल्ला अधिकारी पठाउने तयारी थालेको छ। त्यसका लागि उपयुक्त सहसचिवको खोजी भइरहेको मन्त्रालय स्रोतले जनाएको छ।
यसैबीच गृह मन्त्रालयले कर्मचारी प्रशासन महाशाखाको जिम्मेवारी सहसचिव सुरेश पन्थीलाई दिएको छ। यसअघि विपद् व्यवस्थापन महाशाखासमेत सम्हाल्दै आएका पन्थीलाई कर्मचारी प्रशासनको जिम्मेवारी दिइएको हो।
पन्थीले सम्हाल्दै आएको विपद् व्यवस्थापन महाशाखाको जिम्मेवारी भने अर्का सहसचिवलाई दिने तयारी गृह मन्त्रालयले गरेको छ। त्यसका लागि सहसचिव व्यवस्थापनको गृहकार्य भइरहेको छ।
यस्तै, पछिल्लो पटक सरुवा भएर गृह मन्त्रालय आएका सहसचिव एकदेव अधिकारी र मोतिराम सापकोटाले पनि हालसम्म जिम्मेवारी पाएका छैनन्। मन्त्रालयले दुवै सहसचिवलाई छिट्टै जिम्मेवारी दिने तयारी गरेको जनाएको छ।
गृह मन्त्रालयमा सहसचिवहरूको जिम्मेवारी हेरफेरसँगै विभिन्न महाशाखा तथा जिल्लाका प्रमुख जिल्ला अधिकारीको व्यवस्थापनमा समेत थप फेरबदल हुने देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
