काठमाडौं– भोटेकोसी बाढीसहित विपद्सम्बन्धीं अध्ययन तथा सुझाव पेस गर्ने गरी संसदीय विशेष समिति बनाउने विषयमा बसेको दलका नेताहरूको बैठक बिनानिष्कर्ष टुंगिएको छ ।
बुधबार (भदौ ३१) बसेको दलका प्रमुख नेताहरूको बैठकले संसदीय विशेष समिति बनाउन सभामुखलाई आग्रह गर्ने निर्णय गरेको थियो ।
दलका सभापतिहरूसहितका नेता बसेर गरेको निर्णय कार्यान्वयनका लागि बिहीबार (असोज १) बसेको संसदीय दलका पदाधिकारीहरूको बैठकमा सहमति जुट्न नसकेको हो । सत्तारूढ राष्ट्रिय स्वतन्त्र पार्टी (रास्वपा)ले संसदीय समिति बनाउने विषयमा सहमति जनाए पनि विपक्षीले कसलाई सभापति बनाउने भन्ने नाम मागेका थिए ।
संसदीय विशेष समितिको सभापतिको नाम दिएपछि सदस्यमा कस्तो ‘स्टाटस’का सांसदलाई सिफारिस गर्ने भनेर निर्णय गर्न सहज हुने विपक्षी दलका संसदीय पदाधिकारीहरूको भनाइ थियो । तर, रास्वपा संसदीय दलका उपनेता गणेश पराजुली उक्त प्रस्तावमा सहमत नभएको कांग्रेस संसदीय दलका सचेतक निश्कल राईले जानकारी दिए ।
उनले रास्वपाका तर्फबाट सङ्ख्यात्मक आधारमा समितिको प्रतिनिधित्व हुनुपर्छ भनेकाले निष्कर्षमा पुग्न नसकिएको बताए ।
कांग्रेस सांसद निष्कल राईले संसदीय विशेष समिति सानो आकारको बनाउन आफूहरूले प्रस्ताव गरे पनि सत्तारुढ दल रास्वपाको संसद्को उपस्थितिका आधारमा बनाउनुपर्ने बताएको जानकारी दिए । ‘हामीले ३ महिनाको समिति बनाऔँ, आवश्यक पर्यो भने पछि समय थपौला’, राईले भने, ‘यसमा पक्ष–प्रतिपक्ष भन्दा पनि विपदमा सवै एक हुनुपर्छ ।’
‘फाइभ इज टु वानका आधारमा समिति गठन गरौँ भनेर प्रस्ताव गरेका थियौँ । संयोजक पनि ग्राभिटी भएको नेता बसौँ भन्दा उहाँहरूले सङ्ख्यात्मक आधारमा हुनुपर्छ भनेकाले निष्कर्षमा पुगेनौ’, राईको भनाइ छ ।
विपक्षीका तर्फबाट संसदीय विशेष समिति संयुक्त सदनकै बन्ने अभ्यास छ । राष्ट्रियसभाबाट पनि सानो संख्यामा प्रतिनिधित्व गराउन प्रस्ताव राखिएको थियो । तर, उपनेता पराजुलीले त्यसलाई ठाडै अस्वीकार गरेका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789632334.jpeg){kind=spacer}
-1789631269.jpg)
-1786602170.png)
