काठमाडौं– १८ दिनदेखि अवरुद्ध पृथ्वी राजमार्गको कृष्णभीर सडकखण्डमा आज बिहानदेखि दुईतर्फी यातायात सञ्चालनमा आएको छ। सडक भासिएपछि नयाँ ट्र्याक खोलेर यातायात सञ्चालनमा ल्याइएको हो।
गत भदौ १० गते भोटेकोशीमा आएको बाढीपछि त्रिशूली नदीमा पानीको बहाव बढेको थियो। भदौ १४ गते पुनः आएको बाढीले कृष्णभीरलगायत पृथ्वी राजमार्गका विभिन्न स्थानमा सडक भासिएको थियो। अन्य स्थानमा यातायात सहज भए पनि कृष्णभीरमा सडक पूरै भासिएपछि आवागमन प्रभावित बनेको थियो।
सडक अवरुद्ध भएपछि गत भदौ १८ गतेदेखि नजिकै रहेको ढिस्को काटेर नयाँ ट्र्याक खोल्ने काम सुरु गरिएको थियो। नागढुङ्गा–मुग्लिन सडक योजना (पश्चिम खण्ड)का इञ्जिनियर धीरज ढकालका अनुसार बुधबार साँझसम्म काम सम्पन्न भएपछि आज बिहानदेखि सडक नियमित रूपमा सञ्चालनमा ल्याइएको हो।
पूर्वाधार विकास मन्त्रालयले नयाँ ट्र्याक निर्माण तथा सडक पुनःस्थापनाको काम अघि बढाएको थियो। सडकमा रोकिएका सवारीलाई दुई दिनअघिदेखि नै साँझको समयमा कटाइएको भए पनि आजदेखि नियमित रूपमा दुईतर्फी यातायात सञ्चालन गरिएको हो।
कृष्णभीर सडकखण्ड हुँदै दैनिक करिब १४ हजार सवारीसाधन आवतजावत गर्ने गरेका छन्। उक्त सडक लामो समय अवरुद्ध हुँदा ठूला सवारीसाधन संघीय राजधानी आवतजावत गर्न पाएका थिएनन्। त्यसका कारण राजधानीमा एलपी ग्यासको अभावसमेत देखिएको थियो।
कृष्णभीरमा सवारी सञ्चालनमा आएसँगै नारायणगढ–मुग्लिन सडकखण्डको तुइन खोलामा आंशिक रूपमा रोकिएको सवारी आवागमन पनि आजदेखि सञ्चालनमा ल्याइएको छ। चितवनका प्रमुख जिल्ला अधिकारी गणेश अर्यालले कृष्णभीरमा सवारी सञ्चालनमा आएसँगै तत्कालका लागि तुइन खोलामा आंशिक रूपमा सडक रोकेर भइरहेको पहिरो रोकथामको काम रोकिएको जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798469.jpg)
-1786602170.png)
