काठमाडौं– सर्वदलीय बैठक आह्वानकर्ता राष्ट्रिय स्वतन्त्र पार्टीका सभापति रवि लामिछानेलाई प्रधानमन्त्री वालेन्द्र शाह ‘बालेन’को अनुपस्थितिबारे पत्रकारले बुधबार प्रश्न सोधे। जवाफमा उनले भने– ‘यो प्रश्नलाई आजै तपाईंहरूले डम्प गरिदिए हुन्छ, किनभने हामीले काम बाँडेका छौँ।’
उनले विगतमा जस्तो एकै व्यक्तिले सबै जिम्मेवारी लिन जरुरी नभएको तर्क गर्दै थपे– ‘अहिले त पार्टीको जिम्मेवारी पार्टीले हेर्ने, सरकारको जिम्मेवारी सरकारले, प्रधानमन्त्रीले हेर्ने स्पष्ट खाका, स्पष्ट मार्ग हुँदाहुँदै त्यसको डुप्लिकेसनको आवश्यकता पर्दैन।’
प्रधानमन्त्रीको अनुपस्थितिको औचित्य पुष्टि गर्ने उनको प्रयास थियो।
यसले रवि–बालेन सम्बन्धमा गडबडी छैन भन्ने सन्देश दिन्छ।
पछिल्लो समय सत्ताधारी दल रास्वपा र सरकारबीचको समन्वयबारे अनेक प्रश्न उठ्छन्। जसमध्ये गत साता नियुक्त उद्योग, वाणिज्य तथा आपूर्तिमन्त्री दीपक साहबारे पनि एउटा हो। रविलाई थाहै नदिई दीपकको नियुक्ति भएको चर्चा चल्यो। वास्तविकता के हो त? नेपाललाइभले मन्त्रीसँगको भेटमा यसबारे जान्ने प्रयास गर्यो। मन्त्री साहको जवाफ थियो– ‘मलाई उहाँ (रवि)कै सिफारिसमा मन्त्री बनाइएको हो। तर यो विषय मन्त्री नहुँदासम्म गोप्य राख्ने प्रयास गरियो।’
यी दुवै तथ्यले सार्वजनिक रूपमा रवि–बालेन सम्बन्ध ठिकठाक जस्तो देखिन्छ। भलै कतिपय घटनाक्रमले ती विषय होइन कि भन्ने लाग्छ।
रविले दीपकको छनोट गर्नुको कारण भने राजनीतिक सम्बन्ध मात्र नभएर उनको विगतको कामलाई लिएर पनि रहेछ।
को हुन् दीपक?
गएको फागुन २१ मा सम्पन्न आमनिर्वाचनमा रास्वपाका उम्मेदवार दीपक सुनसरीको क्षेत्र नम्बर ४ बाट प्रतिनिधिसभा सदस्यमा निर्वाचित भएका थिए।
मन्त्री गौरीकुमारी यादवले पदबाट राजीनामा दिएपछि उनलाई प्रधानमन्त्री बालेनले मन्त्री बनाए।
इन्जिनियर साहलाई प्राविधिक विज्ञ मानिन्छ। सन् १९९९ मा त्रिभुवन विश्वविद्यालय, इन्जिनियरिङ अध्ययन संस्थान, पुल्चोक क्याम्पसबाट मेकानिकल इन्जिनियरिङमा प्रथम श्रेणीमा स्नातक हासिल गरेका उनले सन् २०२५ मा नेपाल खुला विश्वविद्यालयबाट ‘नेचुरल रिसोर्स डेभलपमेन्ट’ विषयमा प्रथम श्रेणीमै स्नातकोत्तर उपाधि प्राप्त गरे। यही पृष्ठभूमिका कारण मुलुकको प्राकृतिक स्रोत र साधनको परिचालनमा विशेषज्ञता राख्लान् भनेर उनको छनोट भएको देखिन्छ।
राजनीतिमा पूर्णकालीन हुनुअघि इन्जिनियर साहले जलविद्युत् क्षेत्रमा २३ वर्ष काम गरेका थिए। ऊर्जा क्षेत्रको विकास, व्यवस्थापन र प्राविधिक पक्षमा उनले पुर्याएको योगदानको रास्वपाले मूल्यांकन गरेको देखिन्छ, किनकि उनले संसद्मा ऊर्जा र विकासका एजेन्डाहरूमा तथ्यपरक र तार्किक बहस गरेको रेकर्ड पार्टीले राखेको थियो।
सर्वोदय पार्टी र जनस्वराज पार्टीको अध्यक्षको रूपमा महत्त्वपूर्ण जिम्मेवारी सम्हालिसकेका साह पछिल्लो समय सीके राउत नेतृत्वको जनमत पार्टीको उपाध्यक्षका रूपमा क्रियाशील थिए। तर, निर्वाचनमा उनी रास्वपाका उम्मेदवार बन्न पुगे।
उनको विज्ञतालाई निकै चुनौतीपूर्ण मानिएको मन्त्रालयमा कसरी प्रयोग गर्छन्, त्यो परीक्षणको विषय बनेको छ। तर, उनले मंगलबार मात्र एक साताभित्र ग्यास आपूर्ति सहज बनाउने र चिनीको मूल्य ११० मा स्थिर राख्ने भनी गरेको घोषणा भने निकै अर्थपूर्ण छ। प्रतिबद्धता कार्यान्वयनमा ल्याए उनी सफल मन्त्रीका रूपमा चिनिनेछन्, नआए विगतका उद्योगमन्त्रीजस्तै असफलताको भारी बोकेर बाहिरिने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
