काठमाडौं– नेपाली कांग्रेसका सभापति गगन थापाले भोटेकोशी बाढीपछि उत्पन्न विपद्को अवस्थाबारे अध्ययन तथा काम गर्न गठन हुने संसदीय समितिले तयार पार्ने प्रतिवेदनलाई सरकारले गम्भीरतापूर्वक ग्रहण गर्नुपर्ने बताएका छन्।
सिंहदरबारमा सम्पन्न सर्वदलीय बैठकपछि सञ्चारकर्मीसँग कुरा गर्दै थापाले संसद् र संसदीय समितिको मर्यादा कायम राख्ने जिम्मेवारी सरकारको पनि भएको बताए।
उनले प्रधानमन्त्री बालेन शाहले संसद् र संसदीय समितिलाई बेवास्ता गर्ने अवस्था बन्न नहुनेमा जोड दिए।
‘सम्माननीय प्रधानमन्त्रीजीको जुन खालको रवैया देखिन्छ, सकेसम्म संसद्लाई पूर्ण रूपमा बेवास्ता गर्ने, प्रमुख प्रतिपक्ष दलको नेताले बोल्दा उहाँको उपस्थिति छ भन्ने लाग्दैन,’ थापाले भने।
संसदीय समितिलाई जिम्मेवारी दिएर काम लगाउने तर समितिले तयार पारेको प्रतिवेदनलाई सरकारले बेवास्ता गर्ने अवस्था आउन नहुने उनको भनाइ थियो।
‘यत्रो संसदीय समिति हामीले बनाउने भनेका छौं, यत्रो जिम्मेवारी दिएका छौं । तर, प्रधानमन्त्रीजीले नै संसदीय समितिको मान र मर्यादा राख्नुभएन, यसरी नै बेवास्ता गरिराख्नुभयो भने त्यो बेलामा के गर्ने हो त ?,’ थापाले प्रश्न गरे।
सर्वदलीय बैठक आयोजना गरेकोमा राष्ट्रिय स्वतन्त्र पार्टीका सभापति रवि लामिछानेलाई धन्यवाद दिँदै थापाले सरकार र संसद्बीच सहकार्य आवश्यक रहेको बताए। रास्वपाकै नेतृत्वमा सरकार रहेकाले संसदीय समितिको कामलाई सरकारले अपनत्व दिनुपर्ने उनको भनाइ थियो।
थापाले आफूहरू सरकारलाई बिनासर्त समर्थन गर्दै संसदीय समितिमा बसेर काम गर्न तयार रहेको पनि बताए। समितिले तयार पारेको प्रतिवेदन बुझ्ने, त्यसलाई ग्रहण गर्ने र आवश्यकताअनुसार कार्यान्वयनमा लैजाने जिम्मेवारी सरकारको हुने उनले बताए।
‘हामी त अनकन्डिसन सरकारलाई सपोर्ट गरिरहेका छौं । संसदीय समितिमा बसेर काम पनि गर्छौं । समितिले रिपोर्ट पनि तयार गर्ला,’ उनले भने, ‘तर, त्यो रिपोर्ट बुझ्ने, ग्रहण गर्ने वा त्यसको आधारमा काम गर्ने कुरामा प्रधानमन्त्रीले सामान्य छलफलमा पनि रुचि नराख्ने अवस्था नहोस्।’
थापाले संसदीय समिति गठन हुनुअघि नै प्रधानमन्त्रीलाई समितिको कार्यक्षेत्र र जिम्मेवारीबारे जानकारी गराउनुपर्ने बताए। विगतको संसदीय अभ्यासमा पनि समिति गठन गर्दा सरकार प्रमुखसँग संवाद गर्ने गरिएको उनले स्मरण गरे।
सरकार र संसद्बीच समन्वय गरेर अघि बढ्नुपर्नेमा जोड दिँदै उनले अहिले नै प्रधानमन्त्रीसँग संवाद गर्नु आवश्यक रहेको बताए।
‘एकातिर हामी बैठक गरेर संसदीय समिति बनाउने, अर्कोतिर भोलि प्रधानमन्त्रीले त्यसलाई बेवास्ता गर्ने अवस्था नबनोस्,’ थापाले भने, ‘यो सकारात्मक नोटमा भनेको हो। अहिले नै यसबारे कुरा गरिराख्दा उहाँहरूलाई पनि सजिलो हुन्छ।’
उनले सरकारसँग मिलेर काम गर्न आफूहरू तयार रहेको दोहोर्याउँदै संसदीय समितिको प्रभावकारिता कायम राख्न प्रधानमन्त्रीको समेत अपनत्व आवश्यक रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
