काठमाडौं– राष्ट्रिय प्रजातन्त्र पार्टी (राप्रपा)का पूर्वउपाध्यक्ष रविन्द्र मिश्रले पार्टी अध्यक्ष राजेन्द्र लिङ्देनले चैत १५ गते तीनकुनेमा भएको आन्दोलनबारे दिएको अभिव्यक्तिको प्रतिवाद गरेका छन्।
मिश्रले सामाजिक सञ्जालमा लामो स्टाटस लेख्दै लिङ्देनलाई ‘अति भयो’ भन्दै आफूविरुद्ध पटक–पटक आरोप लगाए पनि अहिलेसम्म मौन बसेको बताएका छन्। तर, तीनकुने आन्दोलनलाई लिएर फेरि ‘विदेशी उक्साहट’को आरोप लगाइएपछि भने आफूले जवाफ दिन बाध्य भएको उनको भनाइ छ।
मिश्रले चैत १५ गतेको प्रदर्शनलाई आफूहरूले ‘रिजेक्ट’ गरेको भए त्यसको एक दिनअघि राप्रपाले किन प्रदर्शनमा सहभागी हुन आह्वान गरेको भन्दै प्रश्न गरेका छन्।
उनले राप्रपाले चैत १४ गते जारी गरेको भनिएको विज्ञप्ति उद्धृत गर्दै लेखेका छन्, ‘भोलि चैत १५ गते काठमाडौंको तीनकुनेमा हुने प्रदर्शन र आन्दोलनमा सक्रिय सहभागी हुन र आन्दोलनलाई उचाइ प्रदान गर्न पार्टी पंक्ति र आम जनसमुदायलाई राप्रपा हार्दिक आह्वान गर्दछ।’
मिश्रका अनुसार उक्त विज्ञप्ति पार्टीबाट जारी मात्र नभई लिङ्देन आफैंले सामाजिक सञ्जालमा समेत सेयर गरेका थिए। उनले लिङ्देनले लेखेको भनिएको अर्को अपिलसमेत सार्वजनिक गर्दै प्रश्न उठाएका छन्।
‘भोलि चैत १५ गते काठमाडौंमा हुने प्रदर्शनमा सक्रियतापूर्वक सहभागी हुन कार्यकर्ता पंक्ति र आम जनसमुदायमा हार्दिक अपील गर्दछु,’ मिश्रले लिङ्देनको पोस्ट उद्धृत गर्दै लेखेका छन्।
तीनकुनेको प्रदर्शन ‘विदेशी उक्साहट’मा भएको दाबी गरिँदै आएको भए आफूले पार्टीका कार्यकर्ता र आम नागरिकलाई उक्त प्रदर्शनमा सक्रिय रूपमा सहभागी हुन किन आह्वान गरेको भन्ने प्रश्न मिश्रले लिङ्देनसमक्ष राखेका छन्।
‘प्रदर्शन विदेशी उक्साहटमा हुँदै थियो भने तपाईँले पार्टीबाट विज्ञप्ति निकालेर, अनि आफैँले, “कार्यकर्ता पंक्ति र आम जनसमुदाय”लाई प्रदर्शनमा सरिक हुन किन अपील गरेको?’ उनले प्रश्न गरेका छन्।
मिश्रले आन्दोलन बिग्रिएपछि त्यसबाट आफूलाई अलग देखाउन खोजिएको आरोपसमेत लगाएका छन्। उनले लेखेका छन्, ‘आफैँ विज्ञप्ति निकालेर अनि सामाजिक सञ्जालमा अपील गरेर “सक्रियतापूर्वक” सहभागी हुन भन्ने अनि आन्दोलन बिग्रिएपछि चोखो बन्न खोज्ने?’
यसअघि आफूलाई पटक–पटक दोष लगाइए पनि प्रतिवाद नगरेको उल्लेख गर्दै मिश्रले अब भने गम्भीर आरोपमा मौन नबस्ने संकेत गरेका छन्।
उनले लिङ्देनको राजनीतिक भाषाशैलीमाथि समेत प्रश्न उठाएका छन्। मिश्रले विभिन्न व्यक्तिमाथि व्यक्तिगत टिप्पणी तथा आरोप लगाउने प्रवृत्तिको आलोचना गर्दै ‘पार्टी अध्यक्ष भएर बोल्ने भाषा हो त्यो?’ भन्दै प्रश्न गरेका छन्।
मिश्रले आफ्नो पोस्टसँगै राप्रपाको चैत १४ गतेको विज्ञप्ति तथा लिङ्देनको सामाजिक सञ्जाल पोस्टको प्रमाणसमेत सार्वजनिक गरेको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
