काठमाडौं– नेपाली कम्युनिष्ट पार्टी (नेकपा) का सहसंयोजक तथा पूर्वप्रधानमन्त्री माधवकुमार नेपालले जलवायु परिवर्तनका सम्बन्धमा आफूले सन् २००९ मा नै विश्वको ध्यानाकर्षण गराएको दावी गरेका छन्।
आज सर्वदलीय बैठकपछि पत्रकारहरूसँग कुरा गर्दै नेपालले वातावरण मन्त्रालयको गठन पनि आफू प्रधानमन्त्री बन्दा नै गरेको स्मरण गरे ।
रास्वपा सभापति रवि लामिछानेले बोलाएको बैठकमा आज नेकपाबाट संयोजक प्रचण्डको साटो नेपाल सहभागी भएका थिए ।
उनले बैठकमा सर्वदलीय राजनीतिक संयन्त्र र संसदीय समिति गठनको विषयमा छलफल भएको जानकारी दिए । त्यसपछि उनले जलवायु परिवर्तनका कारण उत्पन्न भएको विपद्का विषयमा लामै गफ छाँटे।
उनले भने, ‘म प्रधानमन्त्री छँदा विपद्को बारेमा कुरा उठेपछि २००९ को डिसेम्बर ४ मा पहिलो पटक विश्वको ध्यानाकर्षण गर्ने सन्दर्भमा सगरमाथाको बेसक्याम्पमा जलवायु परिवर्तनकै विषयमा क्याबिनेट बैठक आयोजना भएको थियो । त्यो बैठकले सगरमाथा घोषणापत्र जारी गरेको थियो । जलवायु परिवर्तनकै सम्बन्धमा डेनमार्कको कोपनहेगनमा आयोजना भएको सम्मेलनमा नेपालका तर्फबाट म सहभागी भएर विश्व समुदायको ध्यानाकर्षण गराएका थिएँ ।’
नेपालले आफ्नै सरकारको समयमा वातावरण मन्त्रालय गठन भएर विभिन्न नीतिहरू बनाइएको र संयन्त्रहरू गठन भएको उल्लेख गरे ।
प्रधानमन्त्री बालेन्द्र शाहले संयुक्त राष्ट्रसंघको बैठकमा भाग लिएर क्षतिपूर्तिका लागि कुरा राख्नुपर्ने सुझाव दिए । क्षतिपूर्ति मागका लागि नेपालसँग पर्याप्त आधारहरू रहेको उनको भनाइ छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
