काठमाडौं– राष्ट्रिय प्रजातन्त्र पार्टी (राप्रपा)का अध्यक्ष राजेन्द्रप्रसाद लिङ्देनले बागमती प्रदेशका निर्वाचित प्रदेश सांसदहरूमाथि गरेको कारबाही र त्यस क्रममा दिएका अभिव्यक्तिप्रति पार्टीकै बागमती प्रदेशका नेताहरूले गम्भीर आपत्ति जनाएका छन् ।
दलका नेता उद्धव थापा, उपनेता गिरबहादुर तामाङ, प्रमुख सचेतक डम्बर तामाङ, सचेतक मोनिका श्रेष्ठसहित प्रदेशसभा सदस्यहरूले संयुक्त वक्तव्य जारी गर्दै निर्वाचित जनप्रतिनिधिमाथि व्यक्तिगत तथा चरित्रमाथि प्रहार हुने अभिव्यक्ति आपत्तिजनक भएको बताएका हुन् ।
उनीहरूले पार्टीभित्रको असहमति वा विवादलाई लिएर निर्वाचित सांसदलाई ‘अर्को पार्टीसँग बिकेको’ तथा ‘अर्काको ओछ्यान तताएको’ जस्ता शब्द प्रयोग गर्नु राजनीतिक बहस नभई व्यक्तिगत अपमान भएको बताएका छन् ।
वक्तव्यमा सांसदहरू पार्टी हितविपरीत लागेको भए त्यसको प्रमाण सार्वजनिक गर्न अध्यक्ष लिङ्देनसँग माग गरिएको छ । साथै कारबाहीको कानुनी तथा संगठनात्मक आधारसमेत सार्वजनिक गर्न उनीहरूले माग गरेका छन् ।
उनीहरूले सम्बन्धित सांसदलाई आफ्नो पक्ष राख्ने पर्याप्त अवसर दिइएको वा नदिइएको विषय स्पष्ट गर्नुपर्ने बताएका छन् ।
प्रदेश सांसदहरूले सांसदहरूमाथि लगाइएका आरोपका प्रमाण सार्वजनिक गर्न, अपमानजनक अभिव्यक्ति फिर्ता लिन तथा विवाद समाधानका लागि निष्पक्ष वातावरण बनाउन माग गरेका छन् ।
‘पार्टी अनुशासनको नाममा मनपरी स्वीकार्य हुँदैन, नेतृत्वको नाममा अपमान स्वीकार्य हुँदैन र जनताको मतको अपमान स्वीकार्य हुँदैन,’ वक्तव्यमा भनिएको छ ।
उनीहरूले आफूहरू कुनै व्यक्तिको पक्षमा नभई निर्वाचित जनप्रतिनिधिको सम्मान, राजनीतिक मर्यादा, विधिको शासन र लोकतान्त्रिक संस्कारको पक्षमा उभिएको दाबी गरेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
