काठमाडौं– यमनमा हुथी विद्रोही र अन्तर्राष्ट्रिय मान्यता प्राप्त यमनी सरकारबीचको संघर्ष चर्किँदै जाँदा साउदी अरबले हुथी नियन्त्रणमा रहेका क्षेत्रमा ठूलो संख्यामा हवाई आक्रमण गरेको दाबी गरिएको छ। हुथी प्रवक्ता मोहम्मद अब्दुल सलामले पछिल्ला केही दिनमा साउदी अरबले ३५० भन्दा बढी हवाई हमला गरेको आरोप लगाएका छन्।
हुथीहरूले साउदी सेनाले सार्वजनिक तथा निजी सम्पत्तिलाई समेत निशाना बनाएको दाबी गरेका छन्। पछिल्लो समय हुथीहरूले साउदीका सहर र ऊर्जा पूर्वाधारमा आक्रमण बढाउँदै यमनको लालसागर तट हुँदै रणनीतिक बाब अल–मन्देब जलडमरूमध्यतर्फ आफ्नो गतिविधि विस्तार गरेका छन्।
यसैबीच, यमनको अन्तर्राष्ट्रिय मान्यता प्राप्त सरकारका प्रधानमन्त्रीले हुथीमाथि नागरिकको हत्या तथा विस्थापन गराएको आरोप लगाएका छन्। यमनी सेनाले पनि मोखा र धुबाब क्षेत्रमा हुथीका आपूर्ति तथा सैन्य अखडालाई लक्षित गरी हवाई आक्रमण गरेको जनाएको छ।
होर्मुजमा अमेरिकी ड्रोन कब्जा गर्ने इरानको प्रयास असफल
अमेरिकी सेन्ट्रल कमान्डका प्रवक्ता क्याप्टेन टिम हकिन्सले इरानका साना डुंगाले अमेरिकी मानवरहित पानीजहाज कब्जा गर्ने प्रयास गरेको तर त्यो असफल भएको बताएका छन्।
उनका अनुसार अमेरिकी सेनाले तत्काल प्रतिक्रिया जनाएपछि उक्त समुद्री ड्रोन अमेरिकी नियन्त्रणमै रहेको छ।
उता, इरानको अर्धसरकारी समाचार संस्था फार्सले इस्लामिक रिभोलुसनरी गार्ड कोर्प्स (आईआरजीसी) ले होर्मुज जलडमरूमध्यमा अर्को अमेरिकी एमक्यू–१ ड्रोन खसालेको दाबी गरेको छ। फार्सका अनुसार एकै दिनमा उक्त क्षेत्रमा खसालिएको यो तेस्रो ड्रोन हो।
साउदीको तेल पूर्वाधारमा पनि असर
रोयटर्सका अनुसार साउदी अरबको लालसागरस्थित यान्बु बन्दरगाहबाट तेल लोडिङ रोकिएको छ। केही दिनअघि साउदीको पूर्व–पश्चिम तेल पाइपलाइनमा ड्रोन आक्रमण भएपछि पाइपलाइनको सञ्चालनसमेत रोकिएको थियो।
यसैबीच, ओमानको नौसेनाले होर्मुज जलडमरूमध्यमा आक्रमणबाट क्षतिग्रस्त तेल ट्यांकरबाट २३ जना नाविकको उद्धार गरेको छ। दुई जना चालकदलका सदस्य भने अझै बेपत्ता रहेको बताइएको छ।
इरानसँगको आर्थिक सम्बन्धबारे चीनसँग अमेरिकाको संवाद
अमेरिकी अर्थमन्त्री स्कट बेसेन्टले इरानसँग चीनको वित्तीय सम्बन्धका विषयमा बेइजिङसँग अमेरिकाको सकारात्मक निजी छलफल भइरहेको बताएका छन्।
उनका अनुसार अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच सेप्टेम्बरको अन्त्यतिर वासिङ्टनमा हुने भेटवार्तामा इरानको विषयमा थप छलफल हुनेछ।
बेसेन्टले इरानलाई आर्थिक दबाब दिने अभियान जारी राख्दै इरानी शासनलाई आर्थिक, प्राविधिक वा भौतिक सहयोग गर्ने पक्षलाई लक्षित गरिने पनि बताएका छन्।
इजिप्ट र साउदी मिलेर हुथी संकट समाधान गर्नुपर्ने सुझाव
मध्यपूर्व तथा खाडी मामिलाका विज्ञ सिगुर्ड न्युबाउरले इजिप्ट र साउदी अरब मिलेर बाब अल–मन्देबबाट हुथीलाई हटाउने कूटनीतिक पहल गर्नुपर्ने बताएका छन्।
उनको भनाइ इजिप्टका राष्ट्रपति अब्देल फताह अल–सिसी र साउदी युवराज मोहम्मद बिन सलमानबीच कायरोमा भएको भेटवार्ताकै क्रममा आएको हो।
इजरायलले हमास कमान्डर मारिएको दाबी
यसैबीच, इजरायली सेनाले उत्तरी गाजामा रातभर गरिएको हवाई आक्रमणमा हमासको कासाम ब्रिगेडअन्तर्गत जबालिया बटालियनका कमान्डर अहमद बताश मारिएको दाबी गरेको छ।
इजरायली सेनाका अनुसार बताशले उक्त बटालियनका लागि हतियार व्यवस्थापन तथा सैन्य गतिविधिको नेतृत्व गर्दै आएका थिए।
उता, इरानी सञ्चारमाध्यमका अनुसार विदेशमन्त्री अब्बास अराघ्ची र लेबनानी संसद्का सभामुख नबिह बेरीबीच टेलिफोन वार्ता भएको छ। वार्तामा इजरायली आक्रमण, लेबनानको अवस्था र क्षेत्रीय समन्वयबारे छलफल भएको बताइएको छ।
अमेरिकाले भने हुथीसँगको युद्धविराम कायमै रहेको जनाएको छ । इजरायलका लागि अमेरिकी राजदूत माइक हकाबीले अमेरिका र हुथीबीचको युद्धविराम अझै कायम रहेको बताएका छन्।
उनले साउदी अरब र यमनबीचको संघर्षलाई क्षेत्रीय युद्धमा परिणत हुन नदिनु सकारात्मक पक्ष भएको बताएका छन्। अमेरिका र इरानसमर्थित हुथीबीच सन् २०२५ को मेमा युद्धविराम भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
