काठमाडौं– नेपाली कांग्रेसका सभापति गगन थापाले १५औँ महाधिवेशनको वडा अधिवेशन निर्धारित मितिमै सुरु हुने स्पष्ट संकेत गर्दै पार्टीका क्रियाशील सदस्य, समर्थक तथा शुभेच्छुकलाई सक्रिय सहभागिताका लागि आह्वान गरेका छन् ।
सभापति थापाले असोज ३ र ४ गते हुने वडा अधिवेशनमा कुनै अलमलमा नपरी उत्साहका साथ सहभागी हुन कांग्रेसजनलाई अपिल गरेका हुन् । उनको यो आह्वान कांग्रेसभित्र महाधिवेशनको प्रक्रिया, सहभागिता र नेतृत्वलाई लिएर देखिएको विवादबीच आएको हो ।
थापाले नेपालको संविधान, कांग्रेसको विधान र प्रचलित कानुनअनुसार महाधिवेशन प्रक्रिया अघि बढिरहेको भन्दै अधिवेशनमा सहभागी हुने विषयमा कुनै द्विविधा नराख्न आग्रह गरेका छन् ।
उनले पार्टीभित्र फरक मत र असमझदारी हुनु लोकतन्त्रको स्वाभाविक पक्ष भएको उल्लेख गर्दै त्यसको समाधान संवाद, विधि र पद्धतिबाट खोजिनुपर्ने बताएका छन् ।
थापाले पार्टीका अग्रज नेता तथा विभिन्न तहका पदाधिकारी र सदस्यबाट प्राप्त सुझावलाई ध्यानमा राख्दै २०८२ पुससम्म नवीकरण भएका सबै क्रियाशील सदस्यलाई अधिवेशन प्रक्रियामा सहज सहभागिता गराउने निर्णय भइसकेको जानकारी दिएका छन् ।
उनका अनुसार सदस्यता व्यवस्थापन समितिले सोही आधारमा क्रियाशील सदस्यको नामावली टुंग्याइसकेको छ भने केन्द्रीय निर्वाचन समितिले अधिवेशन प्रक्रिया अघि बढाइसकेको छ । निर्वाचन अधिकृतहरू पनि जिल्लामा खटिइसकेका छन् ।
थापाले विशेष महाधिवेशन सम्पन्न हुनुअघिको केन्द्रीय कार्यसमितिका तत्कालीन पदाधिकारी तथा सदस्यलाई वर्तमान केन्द्रीय कार्यसमितिमा समावेश गर्ने निर्णय भइसकेकाले उनीहरू १५औँ महाधिवेशनमा केन्द्रीय सदस्यकै रूपमा सहभागी हुने स्पष्ट पारेका छन् ।
‘अलमलमा नपर्नुस्, अधिवेशनमा सहभागी हुनुस्’
भदौ २८ गते बसेको केन्द्रीय कार्यसम्पादन समितिको बैठकले गरेको निर्णयलाई उल्लेख गर्दै थापाले तत्कालीन केन्द्रीय कार्यसमितिका पदाधिकारी तथा सदस्यको वर्तमान समितिमा सदस्यता सुनिश्चित भइसकेको बताएका छन् ।
त्यसैले असोज ३ र ४ गतेको वडा अधिवेशनसहित निर्धारित कार्यतालिकाअनुसार हुने सबै तहका अधिवेशनमा कुनै अलमल र द्विविधामा नपरी सहभागी हुन उनले विशेष आग्रह गरेका छन् ।
थापाले असोज ३ गते वडाबाट सुरु हुने अधिवेशन प्रक्रिया असोज १६ देखि १९ गतेसम्म काठमाडौंको खुलामञ्चमा हुने १५औँ महाधिवेशनबाट टुंगिने बताएका छन् ।
उनले पार्टीका सबै तहका कार्यसमितिलाई समेत सबैलाई सहभागी गराउँदै सौहार्दपूर्ण र हार्दिक वातावरणमा महाधिवेशन सम्पन्न गर्न अपिल गरेका छन् ।
उनको आह्वानलाई कांग्रेसभित्र महाधिवेशनको कार्यतालिका र सहभागिताबारे देखिएको अन्योल चिर्ने तथा असन्तुष्ट पक्षलाई ‘निर्धारित प्रक्रियामै आउन’ दबाब दिने राजनीतिक सन्देशका रूपमा समेत हेरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
