काठमाडौं– प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले सभामुख डोलप्रसाद (डीपी) अर्याललाई भेटेर बाढीपछिको उद्धार, राहत, पुनर्निर्माण र दीर्घकालीन समाधानका लागि उच्चस्तरीय संसदीय समिति गठनबारे ध्यानाकर्षण गराएका छन् ।
सभामुखको कार्यकक्षमा केही बेरअघि भएको भेटमा आङ्देम्बेले सर्वदलीय बैठकमा उच्चस्तरीय समिति गठन गर्ने भनिएकोमा त्यस्तो कुनै समिति नबनेको विषयमा सभामुखको ध्यानाकर्षण गराएका हुन् ।
सरकार र राजनीतिक दलहरुले सर्वदलीय समिति नबनाइरहेको अवस्थामा संसदले नै उच्चस्तरीय समिति गठन गर्न सक्ने र त्यसका लागि सभामुखले पहल गर्नुपर्ने आङ्देम्बेको भनाइ थियो ।
आङ्देम्बेसँगको भेटमा सभामुखले यसबारेमा सरकार र अन्य राजनीतिक दलहरुसँग पनि छलफल गर्ने बताएको जनाइएको छ ।
प्रधानमन्त्रीको संयुक्त राष्ट्रसंघीय महासभा भ्रमणबारे पनि भेटमा छलफल भएको थियो।
महासभामा बोल्न पाइने थोरै समयमा मुलुकका सबै भावना समेट्न गाह्रो हुने आङ्देम्बेले बताए। ‘त्यहाँ बोल्न पाइने पाँच-छ मिनेटमा धेरै कुरा भन्न सकिँदैन,’ उनले भने, ‘त्यसैले साइड वार्ताहरूमा ध्यान दिनुपर्छ।’
देश छाड्नुअघि प्रधानमन्त्रीले आफ्नै नेतृत्वमा सर्वदलीय संयन्त्रको बैठक बोलाएर छलफल गर्नुपर्ने सुझाव उनले दिए। यसले प्रधानमन्त्रीको भ्रमणलाई थप प्रभावकारी र विश्वसनीय बनाउने उनको दाबी छ।
आङ्देम्बेले सभामुखलाई नेपाली कांग्रेसको १५औँ महाधिवेशनको कार्यतालिकाबारे पनि जानकारी गराए। आगामी ३ र ४ गते वडा, १० गते प्रदेश र क्षेत्र तथा १६ देखि १९ गतेसम्म केन्द्रीय अधिवेशन हुने उनले बताए।
यसैगरी, संसदीय समितिको मागबारे पत्रकारको प्रश्नमा उनले सभामुख सकारात्मक रहेको जवाफ दिए। ‘यो त स्वयं सत्तापक्षका सभापतिले राखेको प्रस्ताव हो,’ उनले भने, ‘यसमा सबै प्रतिपक्षी दलको एकमत छ।’ विपद्को घडीमा पक्ष र प्रतिपक्ष नभनी सबै दल सरकारको साथमा रहेको उनले प्रस्ट पारे। संसदीय समिति संसद्कै आधिकारिक संस्था भएकाले यसलाई सरकारले विपक्षीका रूपमा हेर्न नहुने उनको तर्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
