काठमाण्डौ– धनुषाको विदेह नगरपालिका–६ तीनकोरियाबाट बेपत्ता भएका १५ महिनाका बालक ११ दिनपछि सकुशल फेला परेका छन्।
बालकको अपहरण गरेको आरोपमा प्रहरीले एक महिलालाई पक्राउ गरेको छ।
जिल्ला प्रहरी कार्यालय धनुषाका अनुसार कमलेश महतोका १५ महिनाका छोरा सिधान्त महतो भदौ १८ गते अपराह्न करिब ४ः४० बजे आफ्नै घरको आँगनमा खेलिरहेका बेला अचानक हराएका थिए।
बालक बेपत्ता भएको सूचना पाएलगत्तै प्रहरी चौकी गिद्धाबाट टोली परिचालन गरिएको थियो। त्यसपछि जिल्ला प्रहरी कार्यालय धनुषाका प्रहरी उपरीक्षक रुपेश खड्काको कमान्डमा ६० जनाको प्रहरी टोली खटाइएको थियो। खोजीमा तालिमप्राप्त कुकुरसमेत प्रयोग गरिएको प्रहरीले जनाएको छ।
घटनाको अनुसन्धानका लागि जिल्ला प्रहरी कार्यालय धनुषाका प्रहरी नायब उपरीक्षक ओमप्रकाश खनाल तथा मधेश प्रदेश प्रहरी कार्यालयबाट प्रहरी निरीक्षक बबिन्द्र नेम्बाङको कमान्डमा रहेको प्रादेशिक सूचना विश्लेषण तथा अनुसन्धान समूहसमेत परिचालन गरिएको थियो।
अनुसन्धानका क्रममा बालकलाई कमला नगरपालिका–९ हथलेट्वाकी करिब ४१ वर्षीया पुनिता देवी पासवानले अपहरण गरेको खुल्न आएको प्रहरीको भनाइ छ।
डीएसपी खनालका अनुसार प्रारम्भिक अनुसन्धानबाट आरोपित महिलाले बालकलाई पटक–पटक स्थान परिवर्तन गर्दै नेपाल तथा भारतका विभिन्न ठाउँमा लुकाएर राखेको देखिएको छ।
त्यसपछि प्रहरीले धनुषाका विभिन्न नाकामा २४ घण्टा निगरानी बढाउनुका साथै प्राविधिक अनुसन्धानलाई समेत तीव्र बनाएको थियो।
प्रहरीको घेराबन्दी बढ्दै गएपछि भदौ २९ गते दिउँसो करिब ३ः३५ बजे ती महिलाले बालकलाई उनको घरदेखि करिब ३०० मिटर दक्षिणतर्फ सडकछेउमा छाडेर भागेको प्रहरीले जनाएको छ।
प्रहरीले तत्काल बालकको उद्धार गरी स्वास्थ्य परीक्षण गराएको थियो। स्वास्थ्य अवस्था सामान्य रहेको पुष्टि भएपछि उनलाई अभिभावकको जिम्मा लगाइएको छ।
बालकलाई छाडेर भागेकी पुनिता देवी पासवानलाई पनि प्रहरीले सोही दिन भारततर्फ भाग्ने प्रयास गरिरहेका बेला विदेह नगरपालिका–१ महिनाथपुरस्थित दशगजा क्षेत्रबाट नियन्त्रणमा लिएको जनाएको छ।
प्रहरीका अनुसार उनीविरुद्ध अपहरण, शरीर बन्धक तथा मानव बेचबिखन तथा ओसारपसारसम्बन्धी कसुरमा थप अनुसन्धान भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
