ब्रसेल्स– पोल्यान्डको सीमाछेउ रुसी ड्रोन आक्रमण भएपछि नेटो महासचिव मार्क रुट्टेले युक्रेनलाई थप सहयोग गर्ने प्रतिबद्धता जनाएका छन्।
सोमबार उनले ३२ सदस्यीय सैन्य गठबन्धन रुस–युक्रेन युद्धमा युक्रेनलाई समर्थन गर्नबाट पछि नहट्ने बताए। उनले रुससँग जोडिएको नेटोको पूर्वी सीमामा गठबन्धनको आफ्नै प्रतिरक्षा पनि थप सुदृढ गरिने बताए।
आइतबार रुसी ड्रोनले युक्रेन–पोल्यान्ड सीमाछेउ एउटा रेललाई निशाना बनाएको थियो भने अर्को आक्रमण सीमाको अर्को प्रवेशबिन्दु नजिक भएको थियो।
युक्रेनको सरकारी रेल सञ्चालकका अनुसार बेलायती पूर्वप्रधानमन्त्री बोरिस जोनसन र स्विडेनका पूर्वप्रधानमन्त्री कार्ल बिल्ड्टसहितको कूटनीतिक प्रतिनिधिमण्डल उक्त रेल स्टेसनबाट गुज्रिएको केही मिनेटपछि भएको थियो।
रुट्टेले नेटो क्षेत्र नजिकैका रेलमाथि भएको आक्रमणले रुसी राष्ट्रपति भ्लादिमिर पुटिनको ‘हताशा’ र त्रास फैलाउने उद्देश्य देखाएको बताए। उनका अनुसार युक्रेनविरुद्धको युद्ध जारी राख्दै रुस झन् लापरवाह बन्दै गएको छ।
पोल्यान्डका रक्षामन्त्री व्लादिस्लाव कोसिनियाक–कामिसले सोमबार बाल्टिक सागरमा रहेको जारोस्लावियेक तटीय गाउँनजिकै पोल्यान्डको सेनाले रुसी सैन्य ड्रोनजस्तो देखिने वस्तु फेला पारेको बताए।
युरोपेली संघकी विदेश नीतिकी प्रमुख काजा कालासले पोल्यान्ड सीमाछेउ भएका आक्रमण पश्चिमी देशलाई युक्रेनलाई सहयोग गर्नबाट डराउने उद्देश्यले गरिएको बताइन्। उनले युक्रेनको पक्षमा आफूहरू रहेको र नडराएको देखाउनुपर्ने बताइन्।
रेलमाथि भएको आक्रमणबारे सोधिएको प्रश्नमा रुसी राष्ट्रपति कार्यालय क्रेमलिनका प्रवक्ता दिमित्री पेस्कोभले रुसी सेना ‘युक्रेनको सम्पूर्ण भूभागमा’ कारबाही गरिरहेको र त्यसलाई निरन्तरता दिने बताए।
पोल्यान्डमा युद्ध फैलिन सक्ने चिन्ता
पोल्यान्डका प्रधानमन्त्री डोनाल्ड टस्कले रुसले युक्रेनको पश्चिमी सीमालाई लक्षित गर्दै आफ्नो सैन्य अभियान थप तीव्र बनाउन सक्ने चेतावनी दिएका छन्।
वार्सामा सुरक्षा बैठकपछि आइतबार उनले आगामी केही साता र महिना रुसी पक्षबाट निकै तीव्र गतिविधि हुने र त्यसको प्रभाव पोल्यान्डको भूभागमा समेत पर्न सक्ने सम्भावना अस्वीकार गर्न नसकिने बताए।
पोल्यान्डका अधिकारीहरूका अनुसार गत साता अमेरिकी केन्द्रीय गुप्तचर निकाय (सीआईए)बाट प्राप्त जानकारीसहितका गुप्तचर रिपोर्टले रुसले युक्रेनसँग जोडिएका सीमावर्ती क्षेत्रलाई निशाना बनाउन र युरोपेली देशभित्र तोडफोडका गतिविधि बढाउन सक्ने संकेत गरेका छन्। युक्रेनलाई सहयोग गर्ने देशलाई निरुत्साहित गर्ने रुसी प्रयासको हिस्सा हुन सक्ने उनीहरूको आकलन छ।
टस्कले सम्भावित संयुक्त प्रतिक्रियाको तयारीका लागि नेटोका सहयोगी देशसँग परामर्श गर्ने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791271370.png)
-1786602170.png)
