काठमाडौं– बागमती, गण्डकी र कर्णाली प्रदेशका विभिन्न सडकखण्डमा बाढी, पहिरो तथा सडक निर्माणका कारण राजमार्ग अवरुद्ध भएको छ।
मंगलबार बिहान ६:३० बजेसम्मको विवरणअनुसार केही सडकखण्डमा पूर्ण रूपमा सवारी आवागमन रोकिएको छ भने केहीमा एकतर्फी तथा साना सवारीसाधन मात्र सञ्चालनमा छन्।
बागमती प्रदेशअन्तर्गत काभ्रेमा खुर्कोट–नेपालथोक–कटुञ्जेबेँसीतर्फ चल्ने सम्पूर्ण सवारीसाधनका लागि समयअनुसार आवागमन व्यवस्थापन गरिएको छ। १० टनसम्मका मालवाहक सवारीसाधनलाई राति ९:०० बजेदेखि बिहान ४:०० बजेसम्म सञ्चालन सुचारु हुने र बिहान ४:०० बजेदेखि साँझ ६:०० बजेसम्म परिस्थितिको विचार गरी सवारीसाधन सञ्चालन गरिने प्रहरीले जनाएको छ।
रसुवामा मुख्य राजमार्ग बाढीका कारण गत बैशाख १९ गते बिहान १०:३० बजेदेखि पूर्ण रूपमा अवरुद्ध छ। अर्को सूचना नभएसम्म अवरोध कायम रहने जनाइएको छ।
नुवाकोटमा शिवपुरी गाउँपालिका–५ क्षेत्रमा टोखा–छहरे सडकखण्डमा सम्भावित बाढीपहिरोका कारण राति १०:०० बजेदेखि बिहान ४:०० बजेसम्म अर्को सूचना नभएसम्म सवारीसाधन सञ्चालनमा रोक लगाइएको छ। त्यस्तै, विदुर नगरपालिका–१० सिमटार क्षेत्रमा पासाङल्हामु सडकखण्ड बाढीका कारण पूर्ण रूपमा अवरुद्ध रहेको छ।
धादिङमा बेनीघाट रोराङ गाउँपालिका–७ कृष्णभीर क्षेत्रमा पहिरोका कारण पृथ्वी राजमार्ग पूर्ण रूपमा अवरुद्ध छ। बेनीघाट रोराङ गाउँपालिका–१० जोगडखोलामा भने पृथ्वी राजमार्ग एकतर्फी सञ्चालनमा छ। जिल्लाकै अर्को सडकखण्डमा पनि एकतर्फी सवारी सञ्चालन भइरहेको प्रहरीले जनाएको छ।
नारायणगढ–मुग्लिन सडकखण्डमा सडक भासिएका कारण गाडीको चाप हेरी एकतर्फी सवारी सञ्चालन गरिएको छ। गण्डकी प्रदेशको मनाङमा नासों गाउँपालिका–३ धारापानी क्षेत्रमा चामे–बेँसीसहर सडकखण्डमा बाटो निर्माणका कारण साना सवारीसाधन सञ्चालनमा छन्।
यस्तै, कर्णाली प्रदेशको हुम्लामा सर्केगाड गाउँपालिका–५ खार्पेचेत क्षेत्रमा पहिरोका कारण कर्णाली करिडोर पूर्ण रूपमा अवरुद्ध रहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789439444.webp)
-1787821305.jpg)
-1786602170.png)
-1789383080.png)
