काठमाडौं– शिक्षा तथा खेलकुदमन्त्री सस्मित पोखरेलले विद्यार्थी, शिक्षक, अभिभावक तथा स्थानीय समुदायबाट प्राप्त सुझावका आधारमा शिक्षा प्रणाली र पाठ्यक्रममा आवश्यक सुधार गरिने बताएका छन्।
मधेश प्रदेशको भ्रमणका क्रममा विद्यालयमै पुगेर विद्यार्थी तथा शिक्षकसँग प्रत्यक्ष संवाद गरेका उनले प्राप्त सुझावलाई समेटेर नयाँ पाठ्यक्रम निर्माणको प्रक्रिया अघि बढाइने बताए।
मन्त्री पोखरेलले काठमाडौंमा बन्द कोठामा बसेर मात्रै पाठ्यक्रम निर्माण गर्ने अभ्यास अन्त्य गर्नुपर्ने बताए। ‘विद्यार्थी भाइबहिनीले दिएका सुझाव र गुनासो अत्यन्तै मार्मिक छन्,’ उनले भने,‘उहाँहरूले दिएका सुझावलाई सम्बोधन गरेर अहिलेको पाठ्यक्रममा आवश्यक परिवर्तन गरी नयाँ पाठ्यक्रम निर्माण गर्ने दिशामा अघि बढ्छौं।’
भदौ २६ गते धनुषाबाट सुरु भएको मधेश यात्रा सप्तरीको महावीर माध्यमिक विद्यालयमा पुगेर सम्पन्न भएको थियो। यात्राका क्रममा विद्यार्थी, शिक्षक, अभिभावक र स्थानीय समुदायसँग शिक्षा क्षेत्रका समस्या, आवश्यकता तथा सुधारका विषयमा सुझाव संकलन गरिएको थियो।
मन्त्री पोखरेलका अनुसार विद्यालय र समुदायमा पुगेर संकलन गरिएका सुझावले काठमाडौंमा बसेर जानकारी लिन नसकिने स्थानीय समस्या तथा व्यावहारिक चुनौती बुझ्न सहयोग गरेको छ। यस्ता सुझाव आगामी शिक्षा ऐनलगायत कानुन तथा राष्ट्रिय पाठ्यक्रम निर्माणमा उपयोग गरिने उनले बताए।
सप्तरीको तिलाठीस्थित राष्ट्रिय प्राथमिक विद्यालयसहित बोदेबर्साइन नगरपालिका–३ को श्री इश्वरी हिया सुरैत जिलेवी जनता माध्यमिक विद्यालय र शम्भुनाथ नगरपालिका–६ को श्री बुद्धिलाल विद्या मुनर नमूना माध्यमिक विद्यालयमा पुगेर विद्यार्थी तथा शिक्षकसँग छलफल गरिएको थियो। राजविराज र खडक नगरपालिकाका केही विद्यालयमा पनि विद्यार्थीहरूसँग प्रत्यक्ष संवाद गरिएको थियो।
विद्यार्थीहरूले पाठ्यक्रममा व्यवहारिक तथा जीवनोपयोगी विषय समावेश गर्नुपर्ने, अध्ययनसँगै सीप विकासमा जोड दिनुपर्ने तथा विद्यालयको भौतिक र प्रविधिगत अवस्था सुधार गर्नुपर्ने सुझाव दिएका थिए। राष्ट्रिय पाठ्यक्रम प्रारूप, २०७६ परिमार्जनका लागि देशभरबाट सुझाव संकलन भइरहेको छ।
मन्त्री पोखरेलले मधेशमा गुणस्तरीय इन्जिनियरिङ शिक्षा विस्तारसँगै कृषि शिक्षा र कृषि कलेज स्थापनाको आवश्यकता रहेको बताए। बर्दिबासमा प्रस्तावित मेडिकल कलेज निर्माणस्थलको समेत अवलोकन गर्दै उनले स्थानीय आवश्यकता र अपेक्षाबारे जानकारी लिएका थिए।
मधेश यात्राका क्रममा संकलित समस्या, अनुभव र सुझावलाई तथ्य तथा प्रमाणमा आधारित दस्तावेजका रूपमा समेटिने मन्त्री पोखरेलले बताए। नीति निर्माण वास्तविक समस्या र स्थानीय आवश्यकताका आधारमा हुनुपर्ने उनको भनाइ थियो।
मन्त्री पोखरेलसँगै प्रतिनिधिसभा सदस्य सीताराम साह, डा. अकिता ठाकुर र शिक्षामन्त्रीका प्रमुख सल्लाहकार शैलेन्द्र झा लगायतको टोली मधेश भ्रमणमा सहभागी थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
