-1789010468.jpg)
फाइल तस्बिर
काठमाडौं– बाढी, पहिरो र नदी कटानका कारण देशका विभिन्न जिल्लाका प्रमुख सडक तथा राजमार्ग अवरुद्ध भएका छन्। केही सडकमा भने निश्चित समय तोकेर सवारी सञ्चालन भइरहेको छ।
रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेँसी सडकखण्ड पूर्ण रूपमा अवरुद्ध छ। साउन ८ गते त्रिशूली नदीले सडकको तल्लो भाग कटान गरेपछि अवरुद्ध भएको सडक साउन १० गते आएको बाढीले थप क्षतिग्रस्त बनाएको हो। बाढीका कारण सडकको अधिकांश भाग नष्ट भएको जनाइएको छ।
बाढीका कारण रसुवाको त्रिशूली बजार र बेत्रावती हुँदै रसुवागढी नाकासम्म पुग्ने पासाङ ल्हामु राजमार्ग पनि अवरुद्ध भएको छ। भदौ १० गते आएको बाढीले त्रिशूली नदी किनारका सडकको अधिकांश भाग कटान गरेपछि राजमार्ग पूर्ण रूपमा बन्द भएको हो।
स्याफ्रुबेँसीसम्म पुग्न भने काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किलोमिटर–कालिकास्थान–स्याउबारी–राम्चे–सोले–धुन्चे हुँदै जाने एक लेनको कच्ची सडकलाई वैकल्पिक मार्गका रूपमा प्रयोग गर्न सकिने जनाइएको छ।
धादिङको बेनिघाट रोराङ गाउँपालिका–७ कृष्णभीरमा त्रिशूली नदीले सडक कटान गरेपछि पृथ्वी राजमार्ग पनि पूर्ण रूपमा अवरुद्ध भएको छ। भदौ १४ गते बिहान करिब ८ बजे सडक भासिएपछि राजमार्गमा यातायात ठप्प भएको हो।
सिन्धुपाल्चोकको भोटेकोशी गाउँपालिका–२ घट्टेखोलामा सडक भासिएपछि अरनिको राजमार्ग पनि पूर्ण रूपमा अवरुद्ध भएको छ। भदौ २९ गते बिहान करिब ६:३० बजे सडक भासिएपछि उक्त सडकखण्ड बन्द भएको हो।
सुर्खेतको बराहताल गाउँपालिका–७ औलिसेस्थित कर्णाली राजमार्गमा पहिरो खसेपछि यातायात अवरुद्ध भएको छ। भदौ २९ गते बिहान करिब १ बजे सडक माथिबाट पहिरो खसेपछि राजमार्ग पूर्ण रूपमा बन्द भएको हो।
वि.पि. राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा भने समय तोकेर सवारी सञ्चालन भइरहेको छ। भदौ १६ गतेदेखि बेलुका ७ बजेदेखि बिहान ५ बजेसम्म १० टनसम्मका मालबाहक तथा ढुवानीका साधन सञ्चालन गर्न दिइएको छ। निजी तथा सार्वजनिक यात्रुवाहक सवारी भने बिहान ४ बजेदेखि बेलुका ६ बजेसम्म सञ्चालन गर्न पाइने व्यवस्था छ।
नुवाकोटको टोखा–छहरे सडकखण्डमा वर्षाका कारण रातिको समयमा सवारी आवागमनमा रोक लगाइएको छ। भदौ १ गतेदेखि अर्को सूचना जारी नभएसम्म अत्यावश्यक सेवाबाहेकका सबै सार्वजनिक तथा निजी सवारी राति १० बजेदेखि बिहान ५ बजेसम्म सञ्चालन गर्न पाइने छैन।
चितवनको नारायणगढ–मुग्लिन सडकखण्डमा पनि मर्मत कार्यका कारण निश्चित समय सवारी सञ्चालनमा रोक लगाइएको छ। भदौ २२ गते बिहान ६ बजेदेखि अर्को सूचना जारी नभएसम्म कृष्णभीर सडकखण्डको मर्मत सम्पन्न नभएसम्म यो व्यवस्था लागू हुनेछ। तालिकाअनुसार बिहान ६ बजेदेखि ८ बजेसम्म सडक बन्द र ८ बजेदेखि ८:३० बजेसम्म खुला रहनेछ। त्यसपछि दुई घण्टा बन्द र ३० मिनेट खुला गर्ने क्रम दोहोरिने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1695028561.jpg)
-1786602170.png)
