काठमाडौं– सरकारले भोटेकोशी बाढी प्रभावित परिवारको राहत, पुनर्स्थापना र पुनर्निर्माणलाई उच्च प्राथमिकतामा राख्दै स्थायी आवास निर्माण नहुँदासम्म मासिक आवास भाडा तथा आवश्यक खर्च उपलब्ध गराउने भएको छ।
गत बिहीबार बसेको मन्त्रिपरिषद् बैठकले बाढी प्रभावित परिवारलाई चार सदस्यसम्म मासिक १५ हजार रुपैयाँ उपलब्ध गराउने निर्णय गरेको सूचना तथा सञ्चारमन्त्री विक्रम तिमिल्सिनाले जानकारी दिएका छन् । सामाजिक सञ्जालमार्फत् उनले चार जनाभन्दा बढी सदस्य भएको परिवारका लागि थप प्रत्येक सदस्यबापत २ हजार रुपैयाँ अतिरिक्त उपलब्ध निर्णय भएको उनले सार्वजनिक गरेका छन्।
मन्त्री तिमिल्सिनाका अनुसार कुनै परिवारले उक्त रकम लिन नचाहेमा स्थायी आवास निर्माण नभएसम्मका लागि सरकारले नै अस्थायी आवासको व्यवस्था गर्ने विकल्प पनि दिएको छ। यसका लागि आवश्यक विवरण संकलन गर्न सम्बन्धित सबै स्थानीय तहमा फाराम पठाइसकिएको छ।
सरकारले भोटेकोशी बाढीबाट भएको प्रारम्भिक क्षति तथा नोक्सानीको मूल्याङ्कन सम्पन्न गरिसकेको जनाएको छ। अहिले विस्तृत आवश्यकता मूल्याङ्कन (PDNA) को प्रक्रिया अघि बढिरहेको छ। PDNA बाट प्राप्त विवरणका आधारमा आवश्यक स्रोत सुनिश्चित गरी पुनर्निर्माण तथा पुनर्स्थापनाका कामलाई तीव्रता दिइने सरकारको भनाइ छ।
रसुवा, नुवाकोटसहित बाढी प्रभावित सबै क्षेत्रमा नागरिकको सुरक्षित पुनर्स्थापना, क्षतिग्रस्त पूर्वाधारको पुनर्निर्माण तथा प्रभावित परिवारको जीवनयापनलाई सामान्य अवस्थामा फर्काउने काममा सरकार प्रतिबद्ध रहेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791363924.png)
-1786602170.png)
