काठमाडौं– प्रधान सेनापति अशोकराज सिग्देल आइतबार छिमेकी मुलुक चीन भ्रमणमा निस्केका छन्।
सैनिक प्रवक्ता राजाराम बस्नेतले सेनापति बेइजिङ गएको जानकारी नेपाल लाइभलाई दिएका छन्।
चीनको औपचारिक निमन्त्रणामा उनी एक हप्ताका लागि भ्रमणमा निस्केका हुन्। भ्रमणका क्रममा सिग्देल तेह्रौँ बेइजिङ फोरममा सहभागी हुनेछन्। साथै, अन्य उच्चस्तरीय भेटघाटमा पनि संलग्न हुने बताइएको छ।
सिग्देल असोज ३ गते नेपाल फर्किने तय भएको छ।
यसअघि गत वर्ष २०८२ भदौ २७ देखि असोज ४ गतेसम्म गोन्जाउ र सांघाईमा सैनिक एकाइहरूको कार्यक्रममा सहभागी हुने उनको कार्यक्रम जेन्जी आन्दोलनका कारण रोकिएको थियो।
‘भ्रमणले दुई देशबीचको आपसी सैनिक सम्बन्ध विस्तार हुन गई सैनिक कूटनीतिमार्फत नेपालको परराष्ट्र नीतिलाई समेत योगदान पुग्ने विश्वास नेपाली सेनाले लिएको छ,’ सेनाले जारी गरेको विज्ञप्तिमा भनिएको छ।
भोटेकोशी बाढीका कारण चीन र नेपाल दुवैतर्फ ठूलो मानवीय र भौतिक क्षति भएको समयमा सिग्देलको भ्रमण भएको छ।
प्रधान सेनापतिलाई त्रिभुवन अन्तर्राष्ट्रिय विमानस्थलमा बलाधिकृत रथी प्रदीप जङ्ग के.सी.ले बिदाइ गरेका थिए। प्रधान सेनापतिको अनुपस्थितिमा बलाधिकृत रथी के.सी.ले कायममुकायम प्रधान सेनापतिको कार्यभार सम्हाल्ने बताइएको छ।
भ्रमणपूर्व प्रधान सेनापतिलाई जङ्गी अड्डामा नेपाली सेनाको एक टुकडीले सम्मान गारत अर्पण गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
