काठमाडौं– इजरायलका प्रधानमन्त्रीको कपाल सजावट र मेकअपमा सन् २०१९ देखि अगस्ट २०२६ सम्म करिब ४ लाख ७० हजार अमेरिकी डलर (७ करोड २० लाख रुपैयाँभन्दा बढी) खर्च भएको सरकारी अभिलेखबाट खुलेको छ।
सूचनाको अधिकारअन्तर्गत प्राप्त सरकारी रेकर्डअनुसार सन् २०१९ देखि अगस्ट २०२६ सम्मको उक्त खर्चमा तीन प्रधानमन्त्री बेन्जामिन नेतन्याहु, नफ्ताली बेनेट र याइर ल्यापिडको कार्यकाल समेटिएको छ।
डिसेम्बर २०२५ मा वकिल यारा शलितले प्रधानमन्त्री कार्यालयसँग कपाल सजावट र मेकअपमा भएको सरकारी खर्चको विवरण मागेकी थिइन्। त्यसपछि कार्यालयले विभिन्न वर्ष र महिनामा भएको खर्चको विवरण सार्वजनिक गरेको हो।
अभिलेखअनुसार कपाल र मेकअपमा भएको कुल खर्च करिब ९० प्रतिशत नेतन्याहु र उनकी पत्नी साराले गरेकी थिइन्। यद्यपि, केही कागजातमा उनीहरूका हेयर स्टाइलिस्ट र मेकअप आर्टिस्टको नाम गोप्य राखिएको छ। प्रधानमन्त्री कार्यालयले नाम सार्वजनिक नगर्न राज्य सुरक्षाको कारण देखाएको छ।
युद्ध सुरु भएको वर्ष पनि कपाल र मेकअपमा खर्च
सन् २०२३ को सेप्टेम्बरदेखि नोभेम्बरसम्म प्रधानमन्त्रीको कपाल सजाउन करिब २ हजार ६ सय डलर र मेकअपमा करिब १ हजार ५८० डलर खर्च भएको अभिलेखमा उल्लेख छ। अक्टोबर २०२३ मा मात्रै कपाल सजावटमा करिब ८१० डलर खर्च गरिएको थियो।
समग्रमा सन् २०२३ मा कपाल सजावट र मेकअपमा करिब १ लाख ३ हजार डलर खर्च भएको थियो। यसको तुलनामा बेनेट र ल्यापिड प्रधानमन्त्री रहेका सन् २०२२ मा यही शीर्षकमा करिब २७ हजार ६ सय डलर खर्च भएको थियो।
कोरोना महामारीका बेला नोभेम्बर २०२० मा नेतन्याहु आफैं कपाल काट्न गएको घटना पनि अभिलेखसँग सम्बन्धित विवरणमा उल्लेख गरिएको छ।
सन् २०२५ मा सबैभन्दा बढी खर्च
सन् २०२५ मा नेतन्याहुको कपाल र मेकअपमा सबैभन्दा बढी रकम खर्च भएको थियो। उक्त वर्षको कुल खर्च करिब ९३ लाख रुपैयाँ बराबर रहेको विवरणमा उल्लेख छ।
विदेश भ्रमणका क्रममा पनि यस शीर्षकमा उल्लेख्य खर्च भएको थियो। फेब्रुअरी २०२५ मा हेयर स्टाइलिस्ट र मेकअप आर्टिस्टको सेवामा करिब ११ लाख रुपैयाँ खर्च भएको थियो। विदेश भ्रमणका क्रममा यस शीर्षकमा भएको यो सबैभन्दा ठूलो खर्च थियो।
उक्त भ्रमणका क्रममा नेतन्याहुले अमेरिकी राष्ट्रपति डोनाल्ड ट्रम्पसँग भेट गरेका थिए। उनी ट्रम्पको दोस्रो कार्यकालमा ह्वाइट हाउस पुग्ने पहिलो विदेशी नेता बनेका थिए।
यसअघि जुलाई २०२४ मा नेतन्याहुको वासिङ्टन भ्रमणका क्रममा पनि कपाल र मेकअपमा करिब ९ लाख ६० हजार रुपैयाँ खर्च भएको थियो। फेब्रुअरी २०२५ मा नेतन्याहु चारदिने वासिङ्टन भ्रमणमा गएका थिए।
कपडा र अतिथि सत्कारमा पनि नेतन्याहुको खर्च बढी
कपाल र मेकअपबाहेक प्रधानमन्त्रीको कपडा तथा अतिथि सत्कारमा पनि सरकारी रकम खर्च हुने गरेको अभिलेखले देखाएको छ।
यस शीर्षकमा नेतन्याहुसँग सम्बन्धित खर्च करिब १ करोड १२ लाख रुपैयाँ रहेको थियो। बेनेटको कार्यकालमा करिब १६ लाख रुपैयाँ र ल्यापिडको कार्यकालमा करिब २ लाख २० हजार रुपैयाँ खर्च भएको विवरणमा उल्लेख छ।
यद्यपि, गहना, कपडा र इमेज कन्सल्टिङसँग सम्बन्धित केही खर्चको पूर्ण विवरण सरकारले सार्वजनिक गरेको छैन।
नेतन्याहुको कपालको रंग परिवर्तनबारे इजरायली सञ्चारमाध्यमले विगतमा पनि चर्चा गर्दै आएका छन्। उनका कपाल कहिले गाढा खैरो, कहिले फुस्रो वा सेतो तथा कहिलेकाहीँ हरियो र बैजनी छायामा देखिएको भन्दै विभिन्न रिपोर्ट प्रकाशित भएका थिए।
सन् २०१७ मा कपालको बदलिँदो रंगबारे भएको चर्चाबीच नेतन्याहुले आफैं यस विषयमा मजाक गर्दै ‘ब्राउन नयाँ ग्रे हो’ भनेका थिए। केही सातापछि आफ्नो पुरानै ग्रे रंग फर्किने उनको भनाइ थियो।
सन् २०२१ मा एक अन्तर्वार्ताका क्रममा नेतन्याहुले आफ्नो कपालको रंग परिवर्तनबारे थप जानकारी दिएका थिए। उनले कपालको रंग परिवर्तन गर्न सकिने प्रकारको स्याम्पु प्रयोग गर्ने बताएका थिए। रंग परिवर्तन गर्ने क्रममा उनका कपाल कहिले हरियो, कहिले खैरो र कहिले बैजनी भएको उनले बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
