फाइल तस्बिर
काठमाडौं– वर्षा, बाढी, पहिरो तथा सडक निर्माणका कारण देशका विभिन्न स्थानका राजमार्ग तथा सडकखण्डमा यातायात प्रभावित भएको छ। केही सडकखण्ड पूर्ण रूपमा अवरुद्ध छन् भने केहीमा निश्चित समय तोकेर सवारी सञ्चालनको व्यवस्था गरिएको छ।
काभ्रेपलाञ्चोक–सिन्धुलीअन्तर्गत खुर्कोट–नेपालथोक–कटुन्जेबेँसी सडकखण्डमा भदौ १६ गतेदेखि १० टन तौलसम्मका मालबाहक तथा ढुवानीका साधन बेलुका ७ बजेदेखि बिहान ५ बजेसम्म सञ्चालन हुनेछन्। निजी तथा सार्वजनिक यात्रुवाहक सवारी साधन भने बिहान ४ बजेदेखि बेलुका ६ बजेसम्म सञ्चालन हुनेछन्।
मकवानपुरका विभिन्न राजमार्गमा भदौ १६ गतेदेखि १० चक्कासम्मका मालबाहक तथा ठूला यात्रुवाहक सवारी साधन त्रिभुवन राजपथ हुँदै काठमाडौं जाने र फर्किँदा कान्ति राजमार्ग हुँदै फर्किने व्यवस्था गरिएको छ। कान्ति राजमार्ग हुँदै हेटौंडातर्फ आउने यात्रुवाहक सवारी साधनले साँझ ६ बजेसम्म इलाका प्रहरी कार्यालय ठिङ्गन चेकपोस्ट पार गरिसक्नुपर्नेछ।
१४ सिटभन्दा कम क्षमताका साना यात्रुवाहक सवारी साधन हेटौंडातर्फ आउँदा फर्पिङ–फाखेल–कुलेखानी हुँदै भीमफेदी र काठमाडौं जाँदा भीमफेदी–कुलेखानी–सिस्नेरी–दक्षिणकाली हुँदै जान सक्नेछन्। त्रिखण्डी नजिकको बेलिब्रिजको भारवहन क्षमता कमजोर रहेकाले इन्धन तथा भारी मालबाहक सवारी साधनलाई उक्त पुल प्रयोग नगरी सँगै रहेको डाइभर्सनबाट जान आग्रह गरिएको छ।
विपद्को अवस्था रहेकाले अत्यावश्यक अवस्थामा मात्र यात्रा गर्न, आफ्नो पालोमा अनुशासनपूर्वक सवारी सञ्चालन गर्न, ओभरटेक नगर्न तथा ट्राफिक व्यवस्थापनमा खटिएका सुरक्षाकर्मीको निर्देशन पूर्ण रूपमा पालना गर्न भनिएको छ।
नुवाकोटको टोखा–छहरे सडकखण्डमा भदौ १ गतेदेखि अर्को सूचना जारी नभएसम्म अत्यावश्यक सेवाबाहेक अन्य सार्वजनिक तथा निजी सवारी साधनको रातिको आवतजावत बन्द गरिएको छ। उक्त सडकखण्डमा राति १० बजेदेखि बिहान ५ बजेसम्म सवारी सञ्चालनमा रोक लगाइएको हो।
रसुवाको पासाङ ल्हामु सडकखण्ड पनि पूर्ण रूपमा अवरुद्ध रहेको छ। उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी जाने कच्ची सडकखण्डमा त्रिशूली नदीले सडकको मुनिबाट कटान गरेपछि असार ८ गतेदेखि बाटो अवरुद्ध भएको थियो। असार १० गते आएको बाढीका कारण सडकको अधिकांश भाग नष्ट भएको प्रहरीले जनाएको छ।
रसुवा र नुवाकोट हुँदै रसुवागढी नाकासम्म जाने मुख्य पासाङ ल्हामु राजमार्ग पनि बाढीका कारण पूर्ण रूपमा अवरुद्ध भएको छ। त्रिशूली नदी किनारका अधिकांश भाग कटान भएपछि सडक अवरुद्ध भएको हो। स्याफ्रुबेंसीसम्म जान काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किमि–कालिकास्थान–स्याउबारी–राम्चे–सोले–धुन्चे हुँदै स्याफ्रुबेंसीसम्मको सिंगल लेन कच्ची सडकलाई वैकल्पिक मार्गका रूपमा प्रयोग गर्न सकिनेछ।
धादिङको बेनिघाट रोराङ गाउँपालिका–७ कृष्णभीरस्थित पृथ्वी लोकमार्ग त्रिशूली नदीले कटान गर्दा सडक भासिएपछि भदौ १४ गते बिहान ८ बजेदेखि पूर्ण रूपमा अवरुद्ध रहेको छ।
चितवनको नारायणगढ–मुग्लिन सडकखण्डमा भने तुइनखोला परियोजनाअन्तर्गत माटो कटानको कामका कारण सवारी सञ्चालनमा आंशिक रोक लगाइएको छ। भदौ २२ गते बिहान ६ बजेदेखि अर्को सूचना जारी नभएसम्म कृष्णभीर सडकखण्डको मर्मत कार्य सम्पन्न भई सवारी आवागमन सुचारु नभएसम्म निश्चित समयतालिकाअनुसार सडक बन्द तथा खुला गरिनेछ।
उक्त सडकखण्ड बिहान ६ बजेदेखि ८ बजेसम्म बन्द र ८ बजेदेखि ८:३० बजेसम्म खुला रहनेछ। त्यसपछि क्रमशः दुई घण्टा बन्द र ३० मिनेट खुला गर्ने व्यवस्था गरिएको छ।
सिन्धुपाल्चोकको भोटेकोशी गाउँपालिका–२ घट्टेखोलास्थित अरनिको राजमार्ग पनि सडक भासिएपछि पूर्ण रूपमा अवरुद्ध भएको छ। भदौ २५ गते बिहान ८:१० बजे सडक भासिएर उक्त सडकखण्ड अवरुद्ध भएको हो।
पाँचथरको फालेलुङ गाउँपालिका–८ आकाशेभञ्ज्याङस्थित फिदिम–फालोट सडकखण्ड पनि अवरुद्ध भएको छ। भदौ २६ गते बिहान ८:३० बजे अविरल वर्षाका कारण पहिरो झरेपछि सडक पूर्ण रूपमा बन्द भएको प्रहरीले जनाएको छ।
मनाङको नासों गाउँपालिका–३ धारापानीस्थित चामे–बेँसीसहर सडकखण्डमा सडक निर्माण तथा कंक्रिट ढलानको काम भइरहेकाले सवारी आवागमन बन्द गरिने भएको छ। सडकको आधा भागमा ढलान गर्दा पनि सडक साँघुरो हुने भएकाले भदौ २७ गते बिहान ९ बजेदेखि बेलुका ५ बजेसम्म साना सवारी साधन सञ्चालन बन्द रहनेछन्।
त्यसैगरी, भदौ २८ गते बिहान १० बजेसम्म ठूला सवारी साधनका लागि समेत उक्त सडकखण्ड बन्द रहनेछ। सो सडकखण्डको वैकल्पिक सडक नरहेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
