काठमाडौं– अलकायदाका संस्थापक तथा कुख्यात आतंकवादी ओसामा बिन लादेनका छोरा हमजा बिन लादेन जिउँदै रहेको संकेत गर्ने नयाँ भिडियो सार्वजनिक भएको छ ।
अमेरिकाको ९/११ आतंकवादी हमलाको २५औँ वार्षिकीको अवसरमा अलकायदाको मिडिया शाखा अस–सहाबले करिब ५० मिनेट लामो भिडियो सार्वजनिक गरेको हो। उक्त भिडियोमा हमजा बिन लादेन देखिएको दाबी गरिएको छ।
हमजा सन् २०१९ मा अमेरिकी सैन्य कारबाहीमा मारिएको खबर सार्वजनिक भएको थियो। अफगानिस्तान–पाकिस्तान सीमाक्षेत्रमा आतंकवादीविरुद्ध गरिएको अमेरिकी अभियानमा उनी मारिएको बताइएको थियो। तर अहिले सार्वजनिक भनिएको नयाँ भिडियोमा देखिएको दृश्यले उनको मृत्युबारे पुरानो दाबीमाथि नै प्रश्न उठाएको छ।
माटोको पर्खालअगाडि पगडी लगाएर बसेका हमजा
भिडियोमा हमजा परम्परागत सेतो पगडी लगाएर माटोको पर्खालअगाडि बसेको देखिन्छ। उनको छेउमा असल्ट राइफलसमेत देखिएको सामग्रीमा उल्लेख छ।
सबैभन्दा महत्वपूर्ण कुरा, भिडियोमा देखाइएको हमजाको फुटेज यसअघि सार्वजनिक नभएको दाबी गरिएको छ। यही कारण उनको जीवित अवस्थाबारे नयाँ बहस सुरु भएको हो।
यद्यपि, भिडियोमा देखिएको व्यक्ति वास्तवमै हमजा बिन लादेन नै हुन् वा होइनन् भन्ने विषयमा स्वतन्त्र पुष्टि भने भएको छैन।
अल–जवाहिरीको पनि देखियो नयाँ तस्वीर
५० मिनेट लामो उक्त भिडियोमा अलकायदाका पूर्व प्रमुख अयमान अल–जवाहिरीका केही तस्वीरसमेत देखाइएको छ। विशेष कुरा के छ भने ती तस्वीरहरू यसअघि सार्वजनिक नभएका दाबी गरिएको छ।
अमेरिकी ड्रोन हमलामा जवाहिरी मारिएको बताइए पनि अलकायदाले उनको मृत्यु औपचारिक रूपमा स्वीकार नगरेको सामग्रीमा उल्लेख छ। उनको मृत्युबारे औपचारिक श्रद्धाञ्जली वा सार्वजनिक घोषणा पनि संगठनले नगरेको दाबी गरिएको छ।
भिडियोमार्फत हमजालाई उत्तराधिकारी बनाउन खोजिएको हो ?
विश्लेषक तथा स्रोतहरूलाई उद्धृत गर्दै अन्तर्राष्ट्रिय सञ्चार माध्यमहरुमा प्रकाशित समाचारहरुमा हमजालाई भिडियोमा प्रस्तुत गर्नुका पछाडि अलकायदाको दुईवटा उद्देश्य हुनसक्ने उल्लेख गरेका छन्।
पहिलो, ओसामा बिन लादेनका उत्तराधिकारीका रूपमा हमजाको छवि स्थापित गर्नु र दोस्रो, अलकायदाको कट्टरपन्थी विचारधाराको प्रचार गर्दै संगठनमा नयाँ सदस्य आकर्षित गर्नु।
भिडियोमा हमजाको उपस्थितिलाई संगठनको प्रचार रणनीतिका रूपमा प्रयोग गरिएको हुनसक्ने दाबी पनि गरिएको छ।
भिडियोको सुरुवातमै देखाइयो २०१४ को हमला
अलकायदाले सार्वजनिक गरेको भनिएको भिडियोको सुरुवातसमेत असामान्य रहेको सामग्रीमा उल्लेख छ। भिडियोमा ९/११ हमलासँग सम्बन्धित दृश्यबाट सुरु गर्नुको सट्टा सेप्टेम्बर २०१४ मा पाकिस्तानको कराचीस्थित नौसैनिक डकयार्डमा भएको आक्रमणको दृश्यबाट सुरुवात गरिएको बताइएको छ।
अलकायदासँग सम्बन्धित उक्त आक्रमणको फुटेजलाई सुरुवातमै राखेर संगठनले आफ्नो पुरानो गतिविधि र हिंसात्मक विचारधारालाई पुनः प्रचार गर्न खोजेको हुनसक्ने देखिन्छ।
हमजा बिन लादेन सन् २०१९ मा मारिएको खबर सार्वजनिक भए पनि अहिले सार्वजनिक भएको भनिएको भिडियोले उनको अवस्थाबारे पुनः प्रश्न उठाएको छ। तर भिडियोको आधारमा मात्रै उनी जीवित रहेको निष्कर्षमा पुग्न भने पर्याप्त प्रमाण नरहेको देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
