गुल्मी– गुल्मीको मदाने गाउँपालिकामा मोटरसाइकलको ठक्करबाट पाँच जना पैदलयात्री घाइते भएका छन्। पैदलयात्रीलाई ठक्कर दिएपछि मोटरसाइकल अनियन्त्रित हुँदा चालक र पछाडि सवार व्यक्ति पनि घाइते भएका छन्।
मदाने गाउँपालिका–४ नातिनडाँडास्थित बाझकटेरीबाट पुर्कोटतर्फ जाँदै गरेको लु २ प ७९२९ नम्बरको मोटरसाइकलले सोही दिशातर्फ पैदल हिँडिरहेका पाँच जनालाई ठक्कर दिएको जिल्ला प्रहरी कार्यालय गुल्मीले जनाएको छ।
प्रहरीका अनुसार मोटरसाइकल मदाने गाउँपालिका–४ धारापानीका करिब १७ वर्षीय खुमबहादुर सुनारले चलाएका थिए। पैदलयात्रीलाई ठक्कर दिएपछि मोटरसाइकल अनियन्त्रित हुँदा चालक सुनारसँगै मोटरसाइकलको पछाडि सवार सोही ठाउँका २० वर्षीय माधव सुनार पनि घाइते भएका छन्।
घाइते दुवै मोटरसाइकल सवारको स्थानीय मेडिकल पुर्कोटदहमा उपचार भइरहेको प्रहरीले जनाएको छ।
मोटरसाइकलको ठक्करबाट मदाने गाउँपालिका–२ बाझकटेरी नेटाकी ३५ वर्षीया कविता भुसाल, उनकी ९ वर्षीया छोरी अर्चना भुसाल, सोही स्थानकी ४० वर्षीया कमला विक र १ वर्षीया सविना विक घाइते भएका छन्।
प्रहरीको विवरणअनुसार कमला विक र सविना विक उपचारपछि डिस्चार्ज भइसकेका छन् भने कविता भुसाल र अर्चना भुसालको उपचार जारी छ।
घटनामा पाँच पैदलयात्रीसहित मोटरसाइकलमा सवार दुई जना गरी कुल सात जना घाइते भएको प्रहरीले जनाएको छ। घटनाबारे थप अनुसन्धान भइरहेको जिल्ला प्रहरी कार्यालय गुल्मीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
