काठमाडौं– एसीसी प्रिमियर कपको फाइनलमा यूएईलाई पराजित गर्दै नेपाल दोस्रोपल्ट एसिया कपमा पुगेको छ।
नेपालले अन्तिमपल्ट सन् २०२३ मा एसिया कप खेलेको थियो। उक्त प्रतियोगितामा नेपालले भारत र पाकिस्तानसँग समूह चरणमा खेले पनि जित निकाल्न सकेको थिएन।
यसपल्ट एसियन क्रिकेट काउन्सिल (एसीसी)ले प्रिमियर कप जित्ने टोलीले मात्र एसिया कपमा सहभागिता जनाउने नियम बनाएको थियो। सोही कारण नेपाललाई उपाधि जित्नै पर्ने दबाब थियो। नेपालले उक्त अवस्थामा यूएईलाई ४४ रनले पराजित गर्दै उपाधिसहित एसिया कपमा आफ्नो स्थान सुरक्षित गरेको हो।
नेपालले दिएको ३१४ रनको लक्ष्य पछ्याएको यूएई अन्तिम ५ बल बाँकी रहँदा सबै विकेट गुमाउँदै २६९ रनमै समेटियो।
यूएईका लागि राहुल चोपडाले सर्वाधिक १०० रन बनाए। उनले १०५ बलमा ३ चौका र ४ छक्का प्रहार गरे। सोहाइब खानले ५७ बलमा ४ चौका र २ छक्कासहित ५२ रन बनाए।
तानिस सुरी ४२ र हरप्रित भाटिया ३३ रनमा आउट भए। तर‚ अन्य ब्याटरले उल्लेख्य योगदान दिन नसक्दा यूएई २६९ रनमै समेटियो।
नेपालका करण केसीले ९ ओभरमा ४९ रन खर्चेर ३ विकेट लिए। ललित नारायण राजवंशीले १० ओभरमा ४३ रन दिँदै २ विकेट लिए। सन्दीप लामिछाने, दीपेन्द्र सिंह ऐरी, रोहित कुमार पौडेल, गुल्शन कुमार झा र बासिर अहमदले समान १ विकेट लिए।
त्यसअघि बायुमास क्रिकेट ओभलमा टस जितेर पहिला ब्याटिङ थालेको नेपालले निर्धारित ५० ओभरमा ९ विकेट गुमाउँदै ३१३ रन बनाएको थियो।
नेपालका आसिफ शेखले सर्वाधिक १०२ रन बनाए। १०६ बल खेलेका उनले ८ चौका र ४ छक्का प्रहार गरे।
गुलशन कुमार झाले ३८ बलमा ३ चौका र ४ छक्कासहित ५२ रन जोडे। त्यसअघि अर्जुन कुमालले ६३ बलमा ४३ तथा रोहितकुमार पौडेलले ४४ बलमा ४० रन बनाए।
ईशान पाण्डेले १३ रन बनाए भने दीपेन्द्रसिंह ऐरीले १८ रन जोडे। सन्दीप जोराले ७, करण केसीले १ रन बनाए। यूएईका इब्रार अहमदले सर्वाधिक ४ विकेट लिए। ७.२ ओभर बलिङ गरेका उनले ५१ रन खर्चे। खुजाइमा बिन तनवीरले २ तथा हैदर अली र अदीब उस्मानीले समान १ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
