काठमाडौं– भोटेकोशी–त्रिशूली बाढीबाट प्रभावित क्षेत्रमा खोज तथा उद्धारलाई तीव्र पारिएको छ। नेपाली सेनाले शुक्रबार साँझसम्म विभिन्न प्रभावित क्षेत्रबाट हवाई साधनमार्फत थप ३० जनाको उद्धार गरेको छ।
नेपाली सेनाका अनुसार भदौ २६ गते १७ः३० बजेसम्म हवाई माध्यमबाट उद्धार गरिएका ३० सहित हालसम्म ४ हजार १३७ जनाको उद्धार गरिएको छ। उद्धार गरिएकामध्ये ३ हजार ८५४ जना नेपाली र २८३ जना विदेशी छन्।
बाढीमा पुरिएका तथा प्रभावित जलविद्युत् आयोजनाका टनेलमा समेत खोजी तथा उद्धार कार्य जारी छ। रसुवागढी जलविद्युत् आयोजनामा नेपाली तथा विदेशीसहितको संयुक्त खोज तथा उद्धार टोली परिचालन गरिएको छ।
लाङटाङ हाइड्रोमा नेपाली सेनाको टोलीले टनेलभित्र खोजी गरिरहेको छ भने चिलिमे हाइड्रोमा विदेशी विशेषज्ञसहितको संयुक्त टोलीले टनेलभित्र जमेको लेदो हटाउने काम गरिरहेको छ। Heavy Equipment लैजान टनेलसम्म पुग्ने बाटो निर्माणसमेत सम्पन्न गरिएको सेनाले जनाएको छ।
माथिल्लो त्रिशूली–१ को हाकुबेशीस्थित Audit-1 टनेलमा नेपाली सेनाको टोलीले ड्रोनमार्फत करिब २०० मिटर आसपासको क्षेत्रमा रेकी गरी खोजी गरिरहेको छ। हालसम्म त्यहाँबाट कुनै व्यक्ति फेला नपरेको सेनाले जनाएको छ।
त्यस्तै, त्रिशूली–३ए को पावरहाउस तथा टनेल क्षेत्रमा संयुक्त टोलीले खोजी गरिरहेको छ भने त्रिशूली–३बीमा पनि संयुक्त टोलीबाट खोजी कार्य जारी छ।
प्रभावित क्षेत्रमा पैदल गस्ती र स्वास्थ्य सेवा
सेनाले रसुवा र नुवाकोटका त्रिशूलीपारि कोलोनी, तुप्चे, दानसिङ, सामरी भञ्ज्याङलगायत विभिन्न प्रभावित क्षेत्रमा पैदल गस्तीमार्फत खोजी कार्यलाई निरन्तरता दिएको छ।
स्याफ्रुबेसी होल्डिङ सेन्टरमा बाढी प्रभावितका लागि सञ्चालन गरिएको स्वास्थ्य शिविरबाट शुक्रबार ५४ जनाले स्वास्थ्य सेवा लिएका छन्। त्यस्तै, नेपाली सेनाले त्रिशूली र धुन्चेमा स्थापना गरेका आपत्कालीन उपचार केन्द्र तथा मेडिकल पेट्रोलमार्फत आज ८५ जनाले स्वास्थ्य सेवा पाएका छन्।
सेनाका अनुसार यी स्वास्थ्य केन्द्रबाट हालसम्म ३ हजार ६६५ जनाले स्वास्थ्य सेवा लिइसकेका छन्।
८ हजार ७ सयभन्दा बढी सेना प्रत्यक्ष खटिए
रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रसम्म नेपाली सेनाका ८ हजार ७ सयभन्दा बढी फौज प्रत्यक्ष रूपमा परिचालन गरिएको छ।
उनीहरूले घाइतेको खोज तथा उद्धार, शव व्यवस्थापनमा सहयोग, राहत सामग्री ढुवानी, अवरुद्ध सडक तथा पुल सञ्चालनमा ल्याउने र आपत्कालीन उपचारलगायतका काम गरिरहेका छन्।
सेनाले प्रभावित क्षेत्रमा खोज तथा उद्धारसँगै राहत तथा उपचारका कामलाई समन्वयात्मक रूपमा अघि बढाइरहेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
