फाइल तस्बिर
काठमाडौं– लगातारको वर्षा, बाढी, पहिरो तथा सडक कटानका कारण देशका विभिन्न मुख्य राजमार्गमा सवारी आवागमन प्रभावित भएको छ।
केही सडकमा पूर्ण अवरोध तथा केहीमा निश्चित समय तोकेर सवारी सञ्चालनको व्यवस्था मिलाइएको प्रहरीले जनाएको छ।
काभ्रेपलाञ्चोकको खुर्कोट–नेपालथोक–कटुन्जेबेँसी–सिन्धुली सडकखण्डमा १० टनसम्मका मालबाहक तथा ढुवानीका सवारीसाधन बेलुका ७ बजेदेखि बिहान ५ बजेसम्म सञ्चालन गर्न सकिने व्यवस्था गरिएको छ। निजी तथा सार्वजनिक यात्रुवाहक सवारीसाधन भने बिहान ४ बजेदेखि बेलुका ६ बजेसम्म सञ्चालन हुनेछन्।
मकवानपुरमा १० चक्कासम्मका मालबाहक तथा ठूला यात्रुवाहक सवारीसाधनलाई त्रिभुवन राजपथ हुँदै काठमाडौं जाने र फर्किँदा कान्ति राजमार्ग प्रयोग गर्ने व्यवस्था गरिएको छ। कान्ति राजमार्ग हुँदै हेटौंडातर्फ आउने यात्रुवाहक सवारीसाधनले साँझ ६ बजेसम्म इलाका प्रहरी कार्यालय ठिङ्गन चेकपोस्ट पार गरिसक्नुपर्नेछ।
१४ सिटभन्दा कम क्षमताका साना यात्रुवाहक सवारीसाधन हेटौंडातर्फ आउँदा फर्पिङ–फाखेल–कुलेखानी हुँदै भीमफेदी र काठमाडौं जाँदा भीमफेदी–कुलेखानी–सिस्नेरी–दक्षिणकाली हुँदै जान सक्ने व्यवस्था गरिएको छ। त्रिखण्डी नजिकको बेलिब्रिजको भारवहन क्षमता कमजोर भएकाले इन्धन तथा भारी मालबाहक सवारीसाधनलाई उक्त पुल प्रयोग नगरी नजिकैको डाइभर्सन प्रयोग गर्न भनिएको छ।
नुवाकोटको टोखा–छहरे सडकखण्डमा अत्यावश्यक सेवाबाहेक अन्य सार्वजनिक तथा निजी सवारीसाधनको रातिको आवागमन बन्द गरिएको छ। अर्को सूचना जारी नभएसम्म राति १० बजेदेखि बिहान ५ बजेसम्म उक्त सडकखण्ड बन्द रहनेछ।
रसुवामा त्रिशूली नदीको कटान र त्यसपछि आएको बाढीका कारण पासाङ ल्हामु राजमार्गको ठूलो भाग क्षतिग्रस्त भई सडक पूर्ण रूपमा अवरुद्ध छ। स्याफ्रुबेँसीसम्म पुग्न काठमाडौं–टोखा–छहरे–विदुर–नुवाकोट दरबार–फलाँटे–चोकदे–लच्याङ–सरमथली–पार्च्याङ–भोर्ले–० किलोमिटर–कालिकास्थान–स्याउबारी–राम्चे–सोले–धुन्चे हुँदै स्याफ्रुबेँसीसम्मको एक लेनको कच्ची वैकल्पिक सडक प्रयोग गर्न सकिने प्रहरीले जनाएको छ।
धादिङको बेनिघाट रोराङ गाउँपालिका–७ कृष्णभीरमा त्रिशूली नदीले पृथ्वी राजमार्ग कटान गरेपछि सडक भासिएर राजमार्ग पूर्ण रूपमा अवरुद्ध भएको छ। त्यस्तै, धादिङकै थाक्रे गाउँपालिका–२ कमेरेभीरमा सडक माथिबाट पहिरो खस्दा पृथ्वी राजमार्ग दुईतर्फी अवरुद्ध भएको छ।
मुगुको छायानाथ रारा नगरपालिका–४ ताल्चामा लगातारको वर्षाका कारण नाग्मदेखि गमगढीसम्मको सडकखण्डमा ढुंगा, माटो र लेदोसहितको पहिरो खसेपछि सडक पूर्ण रूपमा अवरुद्ध भएको छ।
चितवनको नारायणगढ–मुग्लिन सडकखण्डमा तुइनखोला परियोजनाअन्तर्गत माटो कटानको काम भइरहेकाले सवारी आवागमनमा आंशिक रोक लगाइएको छ। कृष्णभीर सडकखण्डको मर्मत कार्य सम्पन्न भई आवागमन सुचारु नभएसम्म बिहान ६ देखि ८ बजेसम्म सडक बन्द र ८ देखि ८:३० बजेसम्म खुला रहने गरी दुई घण्टा बन्द तथा ३० मिनेट खुला गर्ने तालिका लागू गरिएको छ।
सिन्धुपाल्चोकको भोटेकोशी गाउँपालिका–२ घट्टेखोलास्थित अरनिको राजमार्ग सडक भासिएपछि पूर्ण रूपमा अवरुद्ध भएको छ।
प्रहरीले विपद्को समयमा अत्यावश्यक अवस्थामा मात्र यात्रा गर्न, चालकले आफ्नो पालोमा अनुशासनपूर्वक सवारी सञ्चालन गर्न, ओभरटेक नगर्न तथा ट्राफिक व्यवस्थापनमा खटिएका सुरक्षाकर्मीको निर्देशन पूर्ण रूपमा पालना गर्न आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
