सिन्धुपाल्चोक– रसुवा बाढीपीडितको राहत, उद्धार तथा पुनर्निर्माणमा सहयोग पुर्याउन सिन्धुपाल्चोकका निजी विद्यालयहरूले १० लाख ४८ हजार ५ सय ५४ रुपैयाँ सहयोग गरेका छन्।
जिल्लामा क्रियाशील निजी तथा आवासीय विद्यालयहरूको संगठन प्याब्सन सिन्धुपाल्चोकले बिहीबार सदरमुकाम चौतारास्थित जुगल बोर्डिङ स्कुलमा आयोजित कार्यक्रममा उक्त रकम हस्तान्तरण गरेको हो।
प्याब्सन जिल्ला अध्यक्ष बुद्धिप्रसाद आचार्यका अनुसार जिल्लाका १७ विद्यालयले सहयोग रकम जुटाएका हुन्। विद्यालयसँगै शिक्षक तथा विद्यार्थीसमेत आफ्नो खाजा खर्च कटाएर सहयोग अभियानमा जोडिएका थिए।
सबैभन्दा बढी बाह्रबिसेको केतु बोर्डिङ स्कुलले १ लाख ७५ हजार रुपैयाँ, मेलम्चीको प्रगति अंग्रेजी माध्यमिक स्कुलले १ लाख ५१ हजार ९ रुपैयाँ र चौताराको जुगल बोर्डिङ स्कुलले १ लाख ४० हजार रुपैयाँ सहयोग गरेका छन्।
विद्यालयहरूले आफ्नो आर्थिक क्षमताअनुसार ७ हजारदेखि पौने २ लाख रुपैयाँसम्म सहयोग गरेका हुन्।
प्याब्सनका केन्द्रीय सदस्य तथा प्रगति स्कुलका प्रधानाध्यापक ऋषि नेपालले प्याब्सनमा आबद्ध देशभरका निजी विद्यालयबाट संकलित १० करोड रुपैयाँ बिहीबार प्रधानमन्त्री दैवी प्रकोप उद्धार कोषमा जम्मा गर्ने कार्यक्रम रहेको जानकारी दिए।
बाढीपीडित बालबालिकाको पढाइको जिम्मा
प्याब्सन सिन्धुपाल्चोकले रसुवा बाढीमा अभिभावक गुमाएका तथा बेपत्ता भएका जिल्लावासीका बालबालिकाको पठनपाठनको जिम्मेवारी लिने घोषणा पनि गरेको छ।
अध्यक्ष आचार्यका अनुसार प्याब्सनमा आबद्ध विद्यालयमा त्यस्ता ७३ जना बालबालिका हाल अध्ययनरत छन्।
‘बाढीबाट अभिभावक गुमाएका बालबालिकाको शिक्षा अवरुद्ध नहोस् भनेर सामाजिक दायित्वअन्तर्गत यस्तो जिम्मेवारी लिँदै छौँ,’ आचार्यले भने, ‘त्यस्ता बालबालिकाको पठनपाठन, लत्ताकपडा र पाठ्यपुस्तकको निःशुल्क व्यवस्था गर्छौँ।’
अभिभावक बाढीमा बेपत्ता भएका जिल्लाका अन्य बालबालिकालाई समेत पठनपाठनमा सहयोग गर्ने प्याब्सनले जनाएको छ। बेपत्ताका परिवारको आर्थिक अवस्थाका आधारमा आंशिकदेखि पूर्ण छात्रवृत्ति उपलब्ध गराउने कार्यक्रमसमेत अघि सारिएको छ।
स्थानीय प्रशासनका अनुसार रसुवा बाढीमा सिन्धुपाल्चोकका मात्रै २ सय ३९ जना बेपत्ता छन्। बेपत्ता हुनेमा चीनसँगको व्यापारमा संलग्न व्यापारी, कन्टेनर चालक तथा सहचालक, कामदार र पर्यटक रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788705448.jpeg)
-1786602170.png)
