काठमाडौं– विगतमा नेपाली कांग्रेस, नेकपा एमाले, नेपाली कम्युनिष्ट पार्टी र अन्य पुराना दलमा हुने गरेको आन्तरिक किचलोको राँको सत्ताधारी दल राष्ट्रिय स्वतन्त्र पार्टीमा पनि सल्किन थालेको छ।
जसको ज्वलन्त उदाहरण बनेको छ, ठूलो संख्यामा मन्त्रीहरू सहभागी भएर भदौ २३ गते गरिएको जेनजी दिवसको कार्यक्रम। यही कार्यक्रमलाई लिएर रास्वपाभित्र चलेको ‘साइबर वार’ सतहमा आएको छ।
कार्यक्रमको ढाँचा, बोलाइएका अतिथिहरू र गृहमन्त्री सुधन गुरुङको रुखो अभिव्यक्तिका कारण वारको अवस्था निम्तिएको हो।
रास्वपाकै ‘नेताहरूले सामाजिक सञ्जालमार्फत गृहमन्त्री गुरुङको बोली र कार्यक्रममाथि टिप्पणी गरेका छन्।
उनीहरूको टिप्पणीलाई रास्वपा सभापति रवि लामिछानेको समर्थनजस्तै देखिएको छ। उनीनिकट संगठन विभाग प्रमुख प्रमोद न्यौपानेले लेखेको स्टाटसलाई रविकै बोलीको रूपमा बुझ्न सकिन्छ।
प्रमोदले फेसबुकमा गुरुङप्रति संकेत गर्दै ‘श्रव्य–कर्कस, दृश्य–बिझाउनेः ‘बदल्छौं’ भन्नेहरू नै बदलिँदै त छैनौँ ?’ लेखेका छन्। पूर्व पत्रकार न्यौपानेले गुरुङले पत्रकार र पुराना नेताबारे बोलेको कुरामा असहमति राखेको बुझ्न गाह्रो छैन।
रास्वपा संसदीय दलकी सचेतक क्रान्तिशिखा धितालले गृहमन्त्रीमाथि प्रश्न उठाएकी छन्। गुरुङले पुराना दललाई ‘सुध्रिन’ चेतावनी दिएका थिए। त्यसतर्फ संकेत गर्दै धितालले ‘सुध्रिनु अरूले मात्रै पर्ने। हामीले चाहिँ सुध्रिनु नपर्ने ? यही दिन देख्नलाई थियो महान् शहीदहरूको बलिदान ?’ भनेकी छिन्।
धितालले पोहोर साल आफूहरूले नै प्रेस स्वतन्त्र होस्, सत्ता निरंकुश नबनोस्, जसको जुन स्थान हो, ऊ त्यही स्थानमा बसोस् भनेर सडकमा उत्रिएको स्मरण गराउँदै ‘हामीले राज्यलाई प्रश्न गरेका थियौँ, सत्तालाई विनम्र हुन भनेका थियौँ’ भनेकी थिइन्।
उनको प्रश्न थियो, ‘अहिले हामीमाथि प्रश्न गर्नेहरूलाई किन हामी धम्की र चेतावनीको भाषा बोल्दै छौँ ? के आज हामी अभिव्यक्ति स्वतन्त्रतालाई बल पुग्ने काम गर्दै छौँ कि हामी बाँकी अधिकारको पनि तेजोबध गर्न उद्धत छौँ ?’
धितालले कार्यक्रमको ढाँचा नै गलत भएको र यसले जेनजीको अपमान भएको तर्क पनि गरेकी छिन्।
रास्वपाका महामन्त्री विपीन आचार्यले समेत यही विषयमा तितो पोखेका छन्। ‘अहङ्कारः विनाशस्य मूलम्। अर्थात्, अहङ्कार नै विनाशको मूल कारण हो’ उनको फेसबुक स्टाटसमा लेखिएको छ।
प्रधानमन्त्री वालेन्द्र शाह बालेनका विश्वासपात्रले पनि गृहमन्त्रीप्रति असन्तुष्टि पोखेका छन्। सांसद राजु पाण्डेले सामाजिक सञ्जालमा लेखेका छन्, ‘जिम्मेवारीमा पुगिसकेकाले... जिम्मेवारी खोसिएकालाई गाली गर्नु लजास्पद हो।’
यसले रास्वपाभित्र साइबर वारले आकार लिइरहेको बुझ्न सकिन्छ। गृहमन्त्रीले उक्त कार्यक्रममा विवादास्पद धर्मगुरु ल्याएको आरोपसमेत लागेको छ। यस्तै, उनले पत्रकार र पुराना दल तथा नेतालाई धम्कीपूर्ण भाषा बोलेका थिए।
उनको भाषणको केही अंश यस्तो छः
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
