काठमाडौं– उद्योग, वाणिज्य तथा आपूर्ति मन्त्री गौरीकुमारी यादव राजीनामा दिएर मन्त्रालयबाट बाहिरिएकी छन्।
बिहीबार प्रधानमन्त्री वालेन्द्र शाहसमक्ष राजीनामा बुझाएपछि उनले आफ्नो कार्यकालमा सहयोग गर्ने सबैप्रति आभार व्यक्त गरेकी छन्।
यादवले मन्त्रालयको जिम्मेवारी निर्वाह गर्ने क्रममा प्राप्त सहयोग र सहकार्यले आफूलाई काम गर्न सहज बनाएको उल्लेख गर्दै सम्बन्धित सबैप्रति हार्दिक आभार व्यक्त गरेकी छन्।
राजीनामापछि जारी सन्देशमा उनले आफ्नो कार्यकालमा मन्त्रालयका कामकारबाहीमा सहयोग पुर्याउने कर्मचारी, सम्बन्धित निकाय तथा सरोकारवाला पक्षप्रति कृतज्ञता व्यक्त गरेकी छन्। यद्यपि, राजीनामा दिनुअघि बिहीबार नै उनले मन्त्रालयका कर्मचारीबाट आफूलाई असहयोग भएको आरोप लगाएकी थिइन्। कर्मचारीहरू उद्योगीको इसारामा चल्ने गरेको आरोप लगाउँदै उनले आफूले केही काम गर्न नसकेको गुनासो गरेकी थिइन्।
यादवले ग्यास उद्योगीलाई पाता कस्नुपर्ने भन्दै विवादित अभिव्यक्ति समेत दिएकी थिइन्।
उनले चैत २७ गते मन्त्री पदको शपथ लिएकी थिइन् । उनी महोत्तरी क्षेत्र नम्बर ४ बाट निर्वाचित सांसद हुन् ।
उनको सचिवालयले सार्वजनिक गरेको जानकारी अनुसार यादवले व्यक्तिगत कारण देखाउँदै बिहीबार (आजै) प्रधानमन्त्री वालेन्द्र शाहसमक्ष पदबाट राजीनामा बुझाएकी थिइन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789031457.png)
-1789030205.png)
-1786602170.png)
