काठमाडौ– नेपाल एलपी ग्यास उद्योग संघले उद्योग, वाणिज्य तथा आपूर्ति मन्त्रीले ग्यास उद्योगीप्रति दिएको अभिव्यक्तिप्रति गम्भीर आपत्ति जनाएको छ।
बुधबार प्रतिनिधि सभाको उद्योग तथा वाणिज्य र श्रम तथा उपभोक्ता हित समितिको बैठकमा मन्त्रीले दिएको अभिव्यक्ति गैरजिम्मेवार भएको भन्दै संघले बिहीबार विज्ञप्तिमार्फत ध्यानाकर्षण गराएको हो।
विगत पाँच दशकभन्दा लामो समयदेखि एलपी ग्यासको कारोबार गर्दै आएका उद्योगहरूले विभिन्न विपद्का समयमा स्रोतसाधन परिचालन गरी निरन्तर सेवा दिँदै आएको संघले जनाएको छ। प्राकृतिक विपत्तिका बेला ग्यासको आपूर्ति तथा बिक्री वितरण सहज बनाउन उद्योगहरू खटिरहेको अवस्थामा जिम्मेवार मन्त्रीबाट गैरलोकतान्त्रिक, गैरजिम्मेवार, अमर्यादित तथा अशोभनीय अभिव्यक्ति आउनु खेदजनक भएको संघको भनाइ छ।
विषम परिस्थितिमा अर्को पक्षलाई दोष देखाएर आफू जिम्मेवारीबाट पन्छिन खोज्ने प्रवृत्तिले समस्या समाधान नहुने भन्दै संघले वर्तमान ग्यास अभावबारे निर्मम र वस्तुनिष्ठ समीक्षा गर्न सरकारसँग आग्रह गरेको छ।
सङ्घका अनुसार आधा सिलिन्डर अर्थात् ७.१ केजी ग्यास १५ दिनका लागि मात्र व्यवस्था गर्ने भनिए पनि उक्त व्यवस्था चार महिनासम्म निरन्तरता दिइयो। त्यसपछि संघले २०८२ चैत १६ गते नेपाल आयल निगमलाई पत्र पठाएर पुनः भरिएको सिलिन्डर बिक्री वितरणमा फर्कन आग्रह गरे पनि त्यसतर्फ ध्यान नदिइएको विज्ञप्तिमा उल्लेख छ।
त्यस्तै, सम्बन्धित निकायसँग व्यवस्था परिमार्जनका लागि गरिएको अनुरोध बेवास्ता हुनु, ग्यास आयातमा तदारुकता नदेखाइनु, पूर्ण सिलिन्डर बिक्री लागू भएपछि सिलिन्डरको माग अचानक बढ्नु तथा पृथ्वी राजमार्गमा भएको अवरोधका कारण ग्यास बुलेटको ढुवानी प्रभावित हुनुले अहिलेको अभाव सिर्जना भएको संघले स्पष्ट पारेको छ।
कुनै उद्योगले बदनियतपूर्वक कृत्रिम अभाव सिर्जना गरेको प्रमाणित भएमा कानुनी कारबाही गर्न सरकारलाई सहयोग गर्न संघ तयार रहेको जनाएको छ। तर कुनै प्रमाणबिना ग्यास उद्योगीलाई दोषी देखाउँदै भौतिक कारबाहीको संकेत दिने किसिमको अभिव्यक्ति अत्यन्त आपत्तिजनक भएको संघको भनाइ छ।
संघका अध्यक्ष कृष्णभक्त श्रेष्ठद्वारा जारी विज्ञप्तिमा कठिन परिस्थितिमा सर्वसाधारणलाई सहज रूपमा ग्यास उपलब्ध गराउने उद्देश्यले सरकारका व्यावहारिक निर्देशन पालना गर्न तथा सरकारसँग सहकार्य गर्न संघ सधैँ प्रतिबद्ध रहेको उल्लेख गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789028077.jpg)
-1789026847.webp)
-1786602170.png)
