काठमाडौं– विश्व स्वास्थ्य संगठन (डब्ल्युएचओ) को दक्षिण–पूर्वी एसिया क्षेत्रीय निर्देशक साइमा वाजेदले पदबाट राजीनामा दिएकी छन्। उनी बंगलादेशकी अपदस्थ प्रधानमन्त्री शेख हसिनाकी छोरी हुन्।
डब्ल्युएचओ तथा बंगलादेशी अधिकारीहरूले उनीमाथि ठगीलगायतका आरोपमा अनुसन्धान गरिरहेका बेला वाजेदले बुधबार राजीनामा दिएकी हुन्।
वाजेदको राजीनामा हसिनाको सत्ताच्युतिपछि त्यसको असर उनको राजनीतिक सहयोगीहरूसँगै परिवारका सदस्यसम्म पनि पुगेको संकेतका रूपमा हेरिएको छ।
सन् २०२४ को मध्यतिर भएको हिंसात्मक जनविद्रोहपछि हसिना सत्ताच्युत भएकी थिइन्। उनका कैयौं सहयोगीमाथि बंगलादेशमा भ्रष्टाचारलगायतका आरोपमा आपराधिक मुद्दा चलिरहेको छ। हसिना भने स्वनिर्वासनमा रहेकी छन्।
वाजेदले सन् २०२४ को सुरुआतमा डब्ल्युएचओको दक्षिण–पूर्वी एसिया क्षेत्रीय निर्देशकको जिम्मेवारी सम्हालेकी थिइन्। उनको कार्यकाल पाँच वर्षका लागि तय गरिएको थियो।
तर‚ डब्ल्युएचओले उनलाई सन् २०२५ को जुलाईमा पहिलोपटक बिदामा पठाएको थियो। त्यसअघि बंगलादेशको भ्रष्टाचारविरोधी आयोगले मार्च २०२५ मा उनीविरुद्ध ठगी र कागजात किर्तेसम्बन्धी आरोपमा मुद्दा दायर गरेको थियो। पछि उनलाई तलबविहीन प्रशासनिक बिदामा राखिएको थियो।
डब्ल्युएचओले वाजेदमाथि चीन भ्रमणसँग सम्बन्धित आर्थिक ठगी र शैक्षिक योग्यताबारे गलत विवरण दिएको आरोपसमेत लगाएको थियो। बंगलादेशमा गैरकानुनी रूपमा जग्गा प्राप्त गरेको आरोप पनि उनीमाथि लगाइएको थियो। वाजेदले भने सबै आरोप अस्वीकार गर्दै आएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
