काठमाडौं– पब्जी मोबाइलको ग्लोबल ओपन साउथ एसियन फल च्याम्पियसिप नेपालमा हुने भएको छ । ई–स्पोर्ट्स संघ नेपाल (ईशान) र पब्जी मोबाईलको आयोजनामा सञ्चालन हुने प्रतियोगिता काठमाडौंको त्रिपुरेश्वरस्थित कभर्डहलमा हुनेछ ।
चार दिने ल्यान प्रतियोगिता भदौ ३१ देखि असोज ३ गतेसम्म सञ्चालन हुनेछ । ईशानका सचिव आशिष दाहाल र पब्जी मोबाइलको तर्फबाट ई–स्पोर्ट्स काउन्टिका ग्लोबल स्पोर्ट्स हेड इमाम हुसेन अफरिदीले कार्यक्रम आयोजना सम्बन्धि सम्झौता पत्रमा हस्ताक्षर गरेका छन् ।
प्रतियोगितामा दक्षिण एसियाका १६ पब्जी टिमले ग्लोबल छनोट हुने लक्ष्यसहित ४० हजार अमेरिकी डलर प्राइज पुलका लागि प्रतिस्पर्धा गर्नेछन् । प्रतियोगितामा नेपालबाट ४, पाकिस्तानबाट ८ र बंगलादेशबाट ४ टिम सहभागी हुनेछन् ।
नेपालबाट आमन्त्रित टिमको रूपमा होरा ई–स्पोर्ट्ससहित टीटूके, हिडन लिफ ई–स्पोर्ट्स र द गेमिङ ब्रोस्किजले प्रतियोगितामा चुनौती पेश गर्नेछन् । प्रत्येक दिन ६ गरी चार दिनमा २४ वटा खेल हुनेछन् ।
ईशानका सचिव दाहालले पब्जी मोबाइलको राष्ट्रिय प्रतियोगिताको सफल आयोजना पश्चात् ग्लोबल ओपनको अन्तराष्ट्रिय कार्यक्रम नेपालमा हुन लागेको बताए । पब्जी मोबाइलका तर्फबाट ग्लोबल ई–स्पोर्ट्स हेड अफरिदीले ई–स्पोर्ट्सअन्तर्गत पब्जीको लोकप्रियताले ग्लोबल इभेन्टका लागि नेपाल उपयुक्त थलो बनेको उल्लेख गरे ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
