काठमाडौं– भोटेकोशी नदीमा आएको भीषण बाढीका कारण दूरसञ्चार तथा इन्टरनेट पूर्वाधारमा क्षति पुगेपछि रसुवाका बाढी प्रभावित क्षेत्रमा निःशुल्क स्याटेलाइट इन्टरनेट सेवा सञ्चालनमा ल्याइएको छ।
डिश मिडिया नेटवर्क लिमिटेड (डिशहोम) ले नेपाल दूरसञ्चार प्राधिकरणको स्वीकृति तथा समन्वयमा युटेलस्याट वनवेबसँगको सहकार्यमा प्रभावित क्षेत्रमा निःशुल्क वनवेब स्याटेलाइट इन्टरनेट सेवा उपलब्ध गराएको हो।
गत भदौ १० गते भोटेकोशी नदीमा आएको बाढीले रसुवा जिल्लाका विभिन्न क्षेत्रमा दूरसञ्चार तथा इन्टरनेट पूर्वाधारमा ठूलो क्षति पुर्याएको थियो। त्यसपछि बाढी प्रभावित क्षेत्रमा सञ्चार सेवा अवरुद्ध वा कमजोर बनेको अवस्थामा उद्धार, राहत तथा समन्वयका लागि वैकल्पिक कनेक्टिभिटी उपलब्ध गराउने उद्देश्यले डिशहोमले विशेष पहल अघि बढाएको जनाएको छ।
डिशहोमका अनुसार भदौ २० गतेदेखि प्राथमिकताका आधारमा प्रभावित क्षेत्रमा स्याटेलाइट इन्टरनेट सेवा उपलब्ध गराउन थालिएको हो। हाल सरकारी कार्यालय, सुरक्षा निकाय, उद्धार तथा राहत शिविर र महत्वपूर्ण समन्वय केन्द्रहरूमा सेवा उपलब्ध गराइएको छ।
युटेलस्याट वनवेबको लो–अर्थ अर्बिट (LEO) स्याटेलाइट प्रविधिमार्फत सञ्चालन गरिएको यो सेवाले बाढीका कारण क्षतिग्रस्त स्थलीय दूरसञ्चार तथा इन्टरनेट पूर्वाधारको वैकल्पिक माध्यमका रूपमा काम गर्ने डिशहोमले जनाएको छ।
स्याटेलाइट इन्टरनेट सेवाले सरकारी निकाय, सुरक्षा निकाय, स्थानीय प्रशासन, उद्धारकर्मी तथा मानवीय सहायता र राहत कार्यमा संलग्न विभिन्न निकायबीच सूचना आदान–प्रदान तथा वास्तविक समयको समन्वयलाई सहज बनाउने अपेक्षा गरिएको छ। आवश्यक डेटा प्रवाहलाई निरन्तरता दिनसमेत यसले सहयोग पुग्ने कम्पनीको भनाइ छ।
प्राकृतिक विपद्का कारण परम्परागत दूरसञ्चार तथा इन्टरनेट सेवा अवरुद्ध हुँदा भरपर्दो वैकल्पिक सञ्चार माध्यम उपलब्ध गराउनु आफ्नो प्राथमिकता रहेको डिशहोमले जनाएको छ।
विपद्को कठिन परिस्थितिमा सरकारी निकाय, सुरक्षा तथा उद्धारकर्मी र प्रभावित समुदायलाई आवश्यक सञ्चार सुविधा उपलब्ध गराउन आफू प्रतिबद्ध रहेको कम्पनीले जनाएको छ। आवश्यकता अनुसार सेवा र स्रोत परिचालन गर्दै जाने पनि डिशहोमले बताएको छ।
डिशहोमले नेपाल दूरसञ्चार प्राधिकरण, सरकारी निकाय, सुरक्षा निकाय तथा स्थानीय सरोकारवालासँग निरन्तर समन्वय गरी प्रभावित क्षेत्रमा कनेक्टिभिटीको आवश्यकता र प्राथमिकताको मूल्याङ्कन गर्ने जनाएको छ।
सञ्चार तथा इन्टरनेट पूर्वाधार पूर्ण रूपमा मर्मत तथा पुनःस्थापना नभएसम्म आवश्यकताका आधारमा उच्च प्राथमिकतामा रहेका थप स्थानमा स्याटेलाइट इन्टरनेट सेवा विस्तार गर्दै जाने प्रतिबद्धता पनि कम्पनीले जनाएको छ।
डिशहोम र युटेलस्याट वनवेबले विपद्का समयमा प्रविधिको प्रभावकारी प्रयोगमार्फत आपत्कालीन सञ्चार, उद्धार तथा राहत कार्यलाई प्रभावकारी बनाउन तथा प्रभावित समुदायको आपत्कालीन प्रतिरोधात्मक क्षमता सुदृढ गर्न योगदान पुर्याउने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
