काठमाडौं– जर्मनीको दक्षिणपन्थी पार्टी अल्टरनेटिभ फर जर्मनी (एएफडी) ले सक्सोनी–आनहाल्ट राज्यको चुनावमा ठूलो सफलता हासिल गरेको छ। एक्जिट पोलका अनुसार एएफडीले करिब ४४ प्रतिशत मत पाउँदै राज्यकै सबैभन्दा ठूलो पार्टी बनेको छ।
यो परिणाम जर्मन चान्सलर फ्रेडरिक मर्ज र उनको कन्जरभेटिभ पार्टीका लागि ठूलो धक्का मानिएको छ। अमेरिकी व्यवसायी इलन मस्कले पनि एएफडीको जितमा बधाई दिएका छन्।
दोस्रो विश्वयुद्धपछि एएफडी पहिलोपटक जर्मनीको कुनै राज्यमा सरकार गठनको यतिनजिक पुगेको हो। यद्यपि‚ जर्मनीका मुख्यधाराका राजनीतिक दलहरूले एएफडीसँग गठबन्धन नगर्ने नीति लिँदै आएका छन्।
सेप्टेम्बर ६ मा म्याग्डेबर्गमा चुनावी नतिजापछि एएफडीका उम्मेदवार उलरिश जिगमुन्ड र पार्टी अध्यक्ष एलिस वाइडल सँगै देखिएका थिए।
जर्मन राजनीतिमा एएफडीको जित किन महत्त्वपूर्ण?
नाजी शासनको इतिहासका कारण जर्मनीका मुख्यधाराका राजनीतिक दलहरूले लामो समयदेखि अत्यधिक दक्षिणपन्थी मानिने दलसँग दूरी कायम राख्दै आएका छन्। एएफडीमाथि पनि दक्षिणपन्थी अतिवादसँग सम्बन्धित आरोप लाग्दै आएको छ।
त्यसैले कुनै राज्यमा एएफडी सरकार गठनको नजिक पुग्नु जर्मन राजनीतिमा महत्त्वपूर्ण परिवर्तनका रूपमा हेरिएको छ। यो प्रभाव सक्सोनी–आनहाल्टमा मात्र सीमित छैन। एएफडी राष्ट्रिय स्तरमा पनि सबैभन्दा लोकप्रिय राजनीतिक दल बनेको दाबी गरिएको छ।
हालैको आईएनएसए सर्वेक्षणमा एएफडीलाई करिब २८ प्रतिशत समर्थन देखाइएको छ भने मर्जको सीडीयू/सीएसयूलाई करिब २० प्रतिशत समर्थन छ।
आप्रवासन, शरणार्थी र जर्मनीको राष्ट्रिय पहिचान एएफडीका प्रमुख राजनीतिक मुद्दा हुन्। एएफडीले आफूलाई परम्परागत राजनीतिक दलहरूको विकल्पका रूपमा प्रस्तुत गर्दै आएको छ। चुनावी अभियानमा उसले आप्रवासन, सुरक्षा र जर्मन पहिचानसँग जोडिएका जनचिन्तालाई प्रमुख मुद्दा बनाएको थियो।
एएफडीका समर्थकहरूले मौजुदा राजनीतिक दलहरूले यी समस्याको समाधान गर्न नसकेको बताउँदै आएका छन्। यही असन्तुष्टिको लाभ विशेषगरी पूर्वी जर्मनीमा एएफडीले पाइरहेको छ।
यस चुनावमा एएफडीले ३५ वर्षीय उलरिश जिगमुन्डलाई मुख्यमन्त्री पदका उम्मेदवार बनाएको थियो। जिगमुन्डले चुनावी परिणामलाई ऐतिहासिक भनेका छन्।
उनले जनताले राजनीतिक परिवर्तन चाहेको र त्यसका लागि एएफडीलाई अवसर दिन चाहेको स्पष्ट भएको बताए। उनले यसलाई सन् २०२९ मा हुने राष्ट्रिय चुनावअघि महत्वपूर्ण कदमका रूपमा व्याख्या गरेका छन्।
अमेरिकी राष्ट्रपति डोनाल्ड ट्रम्पले पनि चुनावी परिणामबारे प्रतिक्रिया दिएका छन्। उनले सामाजिक सञ्जालमा चुनावको अनुमानित नतिजासम्बन्धी एउटा तस्बिर सार्वजनिक गरे पनि त्यससँग कुनै टिप्पणी लेखेका छैनन्।
रुसी राष्ट्रपतिका विशेष दूत किरिल दिमित्रिएभले ट्रम्पको पोस्टको स्क्रिनसट सार्वजनिक गर्दै एएफडीको जितलाई ‘ऐतिहासिक विजय’ भनेका छन्।
एएफडीलाई रुसप्रति तुलनात्मक रूपमा नरम धारणा राख्ने पार्टीका रूपमा हेरिन्छ। उसले युक्रेनलाई जर्मनीले दिँदै आएको सहयोग रोक्न र युक्रेनबाट आएका मानिसलाई शरणार्थीको दर्जा दिने वर्तमान व्यवस्था अन्त्य गर्न माग गर्दै आएको छ।
अमेरिकी व्यवसायी इलन मस्कले पनि एएफडीलाई बधाई दिएका छन्। एएफडीकी सहसंस्थापक तथा राष्ट्रिय नेतृ एलिस वाइडलले चुनावमा पार्टीको अग्रताबारे सामाजिक सञ्जालमा पोस्ट गरेपछि मस्कले जर्मन भाषामा भनेका छन्, ‘राम्रो भयो!’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
