काठमाडौं– अमेरिकाको मियामी अन्तर्राष्ट्रिय विमानस्थलमा कार्गो विमान दुर्घटना हुँदा पाँच जनाको मृत्यु भएको छ।
अमेजन प्राइम एयर नेटवर्कका लागि सञ्चालन भइरहेको बोइङ ७६७ कार्गो विमान अवतरणपछि धावनमार्गबाट बाहिरिएर दुर्घटनामा परेको हो। सीएनएनका अनुसार स्थानीय समयअनुसार आइतबार दिउँसो करिब २ बजे दुर्घटनामा पाँच जनाको मृत्यु भएको छ भने पाँच जना घाइते भएका छन्।
घाइतेमध्ये तीन जनाको अवस्था गम्भीर रहेको बताइएको छ। प्युर्टो रिकोको सान हुआनस्थित लुइस मुनोज मारिन अन्तर्राष्ट्रिय विमानस्थलबाट उडेको विमान मियामीमा अवतरण गर्ने क्रममा धावनमार्गबाट बाहिरिएको थियो।
धावनमार्गबाट बाहिरिएपछि विमानले विमानस्थलनजिक रहेका सवारीसाधनमा ठक्कर दिएको थियो। त्यसपछि विमानमा भीषण आगलागी भएको र आकाशमा कालो धुवाँको बाक्लो मुस्लो देखिएको थियो। ठक्करपछि विमानको अगाडिको भागमा क्षति पुगेको थियो र विमान अगाडितर्फ ढल्किएको अवस्थामा देखिएको थियो।
विमानको चपेटामा परेका केही सवारीसाधनमा मानिसहरू फसेका थिए। विमानका पाइलट र सहपाइलट पनि ककपिटमा फसेका थिए। मियामी–डेड फायर रेस्क्युका ६० भन्दा बढी इकाइ घटनास्थलमा पुगेका थिए।
करिब २०० आपत्कालीन उद्धारकर्मी परिचालन गरिएको थियो। उद्धार टोलीले विशेष फोम प्रयोग गरी विमानमा लागेको आगो निभाएको थियो भने फसेका मानिसहरूलाई बाहिर निकालेको थियो। दुर्घटनाको केही घण्टासम्म विमानबाट इन्धन चुहावटको समस्या पनि देखिएको थियो।
मृतकमध्ये कति जना विमानमा सवार थिए र कति जना जमिनमा रहेका थिए भन्ने अझै स्पष्ट भइसकेको छैन। विमानको गतिविधि निगरानी गर्ने वेबसाइट फ्लाइटराडार२४ को तथ्यांकअनुसार विमान धावनमार्गको प्रयोगयोग्य भाग पार गर्दासम्म करिब ११२ नट अर्थात् करिब २०८ किलोमिटर प्रतिघण्टाको गतिमा थियो। विमानले रनवे ३० मा अवतरण गरेको थियो।
तर‚ विमान समयमै किन रोकिएन भन्नेबारे अहिलेसम्म आधिकारिक जानकारी सार्वजनिक भएको छैन। दुर्घटनाको कारण पनि पुष्टि भएको छैन।
अमेरिकी संघीय उड्डयन प्रशासन (एफएए) ले दुर्घटनाबारे अनुसन्धान गर्ने जनाएको छ। राष्ट्रिय यातायात सुरक्षा बोर्ड (एनटीएसबी) ले पनि घटनासम्बन्धी जानकारी संकलन गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
