काठमाडौं– अमेरिकी राष्ट्रपति डोनाल्ड ट्रम्पले इरानको अत्यन्त सुरक्षित भूमिगत आणविक संरचना पिकैक्स माउन्टेनमा कुनै गतिविधि देखिए त्यसलाई अमेरिकाले तत्काल निशाना बनाउन सक्ने चेतावनी दिएका छन्।
शुक्रबार ओभल अफिसमा पत्रकारहरूसँग कुरा गर्दै ट्रम्पले अमेरिकी गुप्तचर निकायहरूले पिकैक्स माउन्टेनमा भइरहेको गतिविधिमाथि निगरानी गरिरहेको बताए। ‘त्यहाँ कुनै प्रकारको गतिविधि देखिए अमेरिकाले उक्त संरचनामाथि आक्रमण गर्न सक्छ,’ उनले भनेका छन्।
ट्रम्पले पछिल्लो पाँच महिनादेखि इरानविरुद्ध जारी अमेरिकी सैन्य अभियानको बचाउ गर्दै यसको मुख्य उद्देश्य इरानलाई आणविक हतियार निर्माण गर्नबाट रोक्नु रहेको दाबी गरे।
पिकैक्स माउन्टेन इरानको नताञ्ज युरेनियम संवर्धन केन्द्रनजिकै रहेको छ। यसलाई जमिनको निकै गहिराइमा बनाइएको छ। यो बलियो र सुरक्षित परिसर मानिन्स। यसमा जमिनमुनि दुईवटा ठूला सुरुङ प्रणाली रहेको बताइएको छ। तर, नताञ्ज केन्द्रमा यसअघि नै ठूलो क्षति भइसकेको बताइएको छ।
द वाल स्ट्रिट जर्नलको एक रिपोर्टअनुसार इजरायली गुप्तचर अधिकारीहरूले इरानले हजारौं सेन्ट्रिफ्युज उक्त गहिरो भूमिगत संरचनामा पुर्याएको विश्वास गरेका छन्। युरेनियमलाई संवर्धन गर्न सेन्ट्रिफ्युज प्रयोग गरिन्छ।
पिकैक्स माउन्टेन निकै गहिराइमा रहेकाले सामान्य हवाई आक्रमणबाट त्यसलाई क्षति पुर्याउन कठिन हुने बताइएको छ। अमेरिकाले त्यहाँ आक्रमण गरेमा इरानका आणविक संरचनाविरुद्ध जारी सैन्य अभियान थप विस्तार हुन सक्ने देखिन्छ।
ट्रम्पको दाबी– अमेरिकाले ठूलो क्षेत्रीय युद्ध रोकेको छ
ट्रम्पले अमेरिकी सैन्य कारबाहीका कारण पश्चिम एसियामा ठूलो युद्ध हुनबाट रोकिएको पनि दाबी गरेका छन्।
उनका अनुसार अमेरिकाले कारबाही नगरेको भए इजरायल र समग्र पश्चिम एसियाले अझ गम्भीर खतरा सामना गर्नुपर्ने थियो।
‘यदि हामी त्यहाँ नगएको भए आज इजरायल हुने थिएन, मध्यपूर्व हुने थिएन र उनीहरूले त्यसपछि युरोप तथा हाम्रा सहरहरूलाई पनि निशाना बनाउन सक्थे। तर‚ हामीले पाँच महिनामै उनीहरूलाई आणविक हतियार बनाउनबाट रोकेका छौं,’ ट्रम्पले भने।
ट्रम्पले इरानको राडार प्रणालीमाथि हालै गरिएको अमेरिकी आक्रमणबारे पनि बताए। उनले अमेरिकी सेनाले इरानका अत्याधुनिक राडार प्रणाली दुईपटक नष्ट गरेको दाबी गरे।
उनका अनुसार पछिल्लो आक्रमण हुनुअघि केही दिनसम्म कुनै गोलीबारी भएको थिएन। तर‚ इरानले यसअघि राडार प्रणाली तैनाथ गरेको र अमेरिकाले त्यसलाई नष्ट गरेको उनले बताए। त्यसपछि इरानले पुनः नयाँ राडार तैनाथ गरेपछि अमेरिकाले ती पनि नष्ट गरेको ट्रम्पको दाबी छ।
लगातारको आक्रमणपछि इरानले अब नयाँ राडार तैनाथ गर्नबाट जोगिन सक्ने उनको भनाइ थियो। ट्रम्पको पछिल्लो भनाइ अमेरिकी सेन्ट्रल कमान्डले केही दिनअघि इरानका सैन्य संरचनामा नयाँ आक्रमण गरेको जानकारी दिएपछि आएको हो।
कमान्डका अनुसार गत साता भएका आक्रमणमा इरानको इस्लामिक रिभोलुसनरी गार्ड कर्प्ससँग सम्बन्धित संरचनालाई निशाना बनाइएको थियो। तीमध्ये हवाई सुरक्षा प्रणाली, राडार प्रणाली, समुद्री सैन्य उपकरण, समुद्रमा बारुदी सुरुङ बिछ्याउने क्षमता तथा सञ्चारसम्बन्धी संरचना रहेका थिए।
कमान्डले ती आक्रमण कर्प्सले हालै गरेको भनिएको आक्रमण प्रयासपछि गरिएको जनाएको थियो। अमेरिकाका अनुसार ती प्रयासमा होर्मुज हुँदै आवतजावत गर्ने व्यावसायिक पानीजहाज तथा अमेरिकी सैनिकलाई निशाना बनाउने प्रयाससमेत रहेको थियो।
इरानले अमेरिकाका पछिल्ला आक्रमणको कडा निन्दा गरेको छ। इरानले अमेरिकामाथि आफ्नो सार्वभौमिकताको उल्लंघन गरेको तथा विभिन्न प्रान्तमा गैरसैन्य पूर्वाधार र नागरिक संरचनालाई निशाना बनाएको आरोप लगाएको छ।
इरानको विदेश मन्त्रालयले आफ्ना सेनाले अमेरिकाविरुद्ध कडा प्रतिरक्षात्मक आक्रमण गरेको जनाएको छ।
इरानका अनुसार पश्चिम एसियामा रहेका अमेरिकी सैन्य संरचनाबाटै अमेरिकी आक्रमण सुरु र तयारी भइरहेको थियो। त्यसैले आफ्ना जवाफी आक्रमणमा ती अमेरिकी सैन्य संरचनालाई निशाना बनाइएको इरानको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
