काठमाडौं– सरकारले रसुवाको भोटेकोसी नदीमा आएको बाढीले क्षति पुर्याएका २० वटा झोलुंगे पुलको तत्काल मर्मत गर्ने भएको छ ।
क्षतिग्रस्त पुलको मर्मत तथा सञ्चालनमा सरकार युद्धस्तरमा लागेको प्रधानमन्त्री तथा मन्त्रिपरिषद्को कार्यालयले जनाएको छ ।
१० भदौमा आएको बाढीले मुग्लिङदेखि टिमुरेसम्म रहेका ६४ वटा झोलुंगे पुलमध्ये ५३ वटामा क्षति पुर्याएको थियो । सरकारी अधिकारीहरूले प्रभावित क्षेत्रमा पुगेर मूल्यांकन गर्दा क्षति पुगेका ५३ मध्ये २० वटा झोलुंगे पुलको मर्मत गर्नुपर्ने निष्कर्ष निकालेका थिए ।
यी पुल मर्मतका लागि सरकारले १७ भदौमा कार्यादेश जारी गरेको थियो, जसमध्ये महेश दोभान–मास्टार, कालिकाथान, मलिङ्गा–मझुवाटार, केउरेनी–गहते र पिमलटार–जागराम खोला झोलुंगे पुलको मर्मतमा प्रगति भएको छ ।
यी पाँच वटा झोलुंगे पुल एक महिनाभित्र मर्मत सम्पन्न गरिने सरकारले जनाएको छ । त्यसैगरी, पुनर्निर्माण गर्नुपर्ने ३३ वटा झोलुंगे पुलका लागि पनि सरकारले १७ भदौमा बोलपत्र आह्वान गरिसकेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
