तस्बिरहरू : नुवाकोटको विदुरस्थित चन्द्रज्योति मावि होल्डिङ सेन्टरमा बाढी प्रभावितलाई सहयोग तथा होल्डिङ सेन्टर व्यवस्थापनमा खटिएको गोल्याण फाउण्डेशनको स्वयंसेवी समूह ।
काठमाडौं– भदौ १० गते नै नुवाकोटको विदुर पुगेर राहत तथा सहयोग कार्य सुरु गरेको गोल्याण फाउण्डेशनले अहिले चन्द्रज्योति माध्यमिक विद्यालय होल्डिङ सेन्टरमा करिब ४ सय जनालाई भोजनसँगै स्वास्थ्य उपचार र मनोपरामर्श सेवा दिइरहेको छ । फाउण्डेशनले बालबालिकाका लागि खेल सामग्री तथा आवश्यक लत्ताकपडासमेत उपलब्ध गराएको छ ।
काठमाडौं । भोटेकोशीलगायतका नदी बेसिनमा आएको बाढीबाट ९ सयभन्दा बढी नागरिकको ज्यान गएको छ भने करिब ४ हजार जना बेपत्ता छन् । बाढीबाट जोगिएकाहरू पनि घरबारविहीन बनेका छन् । उनीहरूको अवस्था निकै कष्टकर छ ।
यस्तो अवस्थामा गोल्याण ग्रुपअन्तर्गतको समाजसेवी संस्था गोल्याण फाउण्डेशन बाढी गएको भोलिपल्ट अर्थात् भदौ ११ गतेदेखि नै प्रभावित क्षेत्रमा खटिएको छ । फाउण्डेशनले बाढी प्रभावित क्षेत्रमध्ये नुवाकोटको विदुर नगरपालिका–३ स्थित चन्द्रज्योति माध्यमिक विद्यालय होल्डिङ सेन्टरमा भोजन, स्वास्थ्य उपचार, मनोपरामर्शलगायतका सेवा दिइरहेको छ ।
होल्डिङ सेन्टरमा देवीघाट क्षेत्रका ६८ घरपरिवार रहेका छन् । ती परिवारका सदस्यसहित आसपासका बासिन्दासमेत गरी दैनिक करिब ४ सय जनाका लागि तीनपटक खाना तथा खाजाको व्यवस्था गरिएको छ । भोजनका अतिरिक्त सामान्य स्वास्थ्य सेवा र बालमनोपरामर्श सेवा पनि प्रदान गरिएको छ ।
गोल्याण फाउण्डेशनले उक्त कार्यका लागि ५० जना स्वयंसेवक, कर्मचारी तथा मनोपरामर्शकर्ता परिचालन गरेको छ । गोल्याण ग्रुपका कर्पोरेट अफेयर्स एन्ड कम्युनिकेसन्स प्रमुख तथा फाउण्डेशनकी प्रमुख कार्यकारी अधिकृत ज्योति गैह्रेको नेतृत्वमा स्वयंसेवी समूह खटिएको छ ।
होल्डिङ सेन्टरमा करिब ४० जना बालबालिकासमेत रहेका छन् । उनीहरूका लागि खेल सामग्री उपलब्ध गराउनुका साथै बालमनोपरामर्शको काम पनि भइरहेको सीईओ गैह्रेले बताइन् ।
‘कत्ति पनि ढिलो नगरी गोल्याण फाउण्डेशनको स्वयंसेवी समूह बाढीको भोलिपल्टै प्रभावित क्षेत्रमा पुगेर तत्काल खानपिनको व्यवस्था गर्यो,’ उनले भनिन् ।
गोल्याण ग्रुपका अध्यक्ष तथा प्रबन्ध निर्देशक अक्षय गोल्याणले विपत्तिको समयमा प्रभावित नागरिकलाई साथ र सहयोग दिनुपर्छ भन्ने मान्यताका साथ बाढी गएको दिनमै राहत तथा सहयोगको योजना बनाइएको बताए ।
‘यस्तो बेला प्रभावित क्षेत्रमै पुगेर सहयोग गर्नुपर्छ भन्ने हिसाबले हामीले नुवाकोटको विदुरमा गएर तत्काल राहत तथा सहयोग कार्य गर्यौं,’ उनले भने, ‘अवस्था सामान्य नभएसम्म हाम्रो सहयोग जारी रहन्छ । नेपाल सरकार र सरकारी निकायसँग समन्वय गरेर राहत तथा सहयोग कार्यलाई अझ प्रभावकारी बनाइनेछ ।’
गोल्याण ग्रुपले प्रभावित क्षेत्रमा पुगेर तत्काल राहत उपलब्ध गराउनुका साथै प्रधानमन्त्री दैवी प्रकोप उद्धार कोषमा १ करोड रुपैयाँ सहयोग गरेको छ । गोल्याण ग्रुपअन्तर्गतको रिलायन्स स्पिनिङ मिल्सले सोमबार बाढी प्रभावितको सहयोगार्थ नेपाल सरकारलाई १ करोड रुपैयाँ हस्तान्तरण गरेको हो ।
कम्पनीका प्रबन्ध निर्देशक अक्षय गोल्याण र निर्देशक शशिकान्त अग्रवालले अर्थमन्त्री स्वर्णिम वाग्लेलाई चेक हस्तान्तरण गरेका थिए । रिलायन्स स्पिनिङ मिल्स नेपालको प्रमुख धागो उत्पादक कम्पनी हो । कम्पनीले सुनसरीको दुहबी र खनारस्थित उद्योगबाट धागो उत्पादन गर्दै आएको छ ।
प्राकृतिक विपत्तिको समयमा नागरिक तथा सरकारलाई सहयोग गर्ने सामाजिक उत्तरदायित्वअन्तर्गत उक्त रकम सहयोग गरिएको कम्पनीले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
