फाइल तस्बिर
काठमाडौं– लगातारको वर्षासँगै बाढी तथा पहिरोको जोखिम बढेपछि देशका विभिन्न प्रमुख राजमार्गमा यातायात प्रभावित भएको छ।
नेपाल प्रहरीको पछिल्लो सार्वजनिक सूचनाअनुसार काठमाडौं उपत्यकादेखि कोशी, बागमती र कर्णाली प्रदेशसम्मका विभिन्न सडकखण्डमा आवागमन रोकिएको वा सवारी सञ्चालनमा प्रतिबन्ध लगाइएको छ।
काठमाडौंको नागढुंगादेखि मुग्लिन सडकखण्ड बाढी तथा पहिरोको सम्भावित जोखिमका कारण पूर्ण रूपमा बन्द गरिएको छ। यसले काठमाडौं भित्रिने र बाहिरिने मुख्य सडकमार्गमा यातायात प्रभावित भएको छ।
त्यस्तै, कोशी प्रदेशको इलाममा मेची राजमार्ग अन्तर्गतको इलाम नगरपालिका–९, राजदुवाली क्षेत्रमा सडक अवरुद्ध भएको प्रहरी विवरणमा उल्लेख छ। वैकल्पिक बाटोबाट यातायात सञ्चालनको व्यवस्था गरिएको जनाइएको छ।
बागमती प्रदेशअन्तर्गत काभ्रेको खुर्कोट–नेपालथोक–कटुन्जेबेँसी सडकखण्ड (बीपी राजमार्ग) मा सम्भावित बाढीलाई मध्यनजर गर्दै सवारी सञ्चालनमा रोक लगाइएको छ।
सूचनाअनुसार रातिको समयमा सवारी साधन सञ्चालनमा रोक लगाई बिहानदेखि साँझसम्म अवस्थाअनुसार यातायात सञ्चालन गर्ने व्यवस्था गरिएको छ। बीपी राजमार्गमा सम्भावित बाढीका कारण आवागमनमा समयअनुसार प्रतिबन्ध लगाइएको उल्लेख छ।
मकवानपुरको हेटौंडा–भीमफेदी–बागमती–ललितपुर सडकखण्डमा समेत जोखिमका कारण सवारी सञ्चालन प्रभावित भएको छ। रसुवामा त्रिशूली मेलुङ–स्याफ्रुबेँसी सडकखण्ड तथा मुख्य राजमार्ग बाढी तथा पहिरोका कारण प्रभावित भएको छ। केही सडकमा पूर्ण रूपमा आवागमन रोकिएको प्रहरीले जनाएको छ।
धादिङमा पृथ्वी राजमार्गका विभिन्न स्थानमा बाढी र लेदोका कारण सडक अवरुद्ध भएको छ। बेनिघाट–रोराङको ज्वाङखोला, गजुरी क्षेत्र, गलौंदी, जहरेखेत, बाङ्गेमोड तथा बैरेनीलगायतका स्थानमा सडकमा आएको लेदो तथा पहिरो हटाउने काम भइरहेको प्रहरी विवरणमा उल्लेख छ।
चितवनतर्फ मुग्लिन–नारायणगढ सडकखण्ड पनि बाढी तथा पहिरोको जोखिममा परेको छ। जोखिम बढेपछि केही स्थानमा सवारी आवागमन रोक्ने तथा अवस्था हेरेर सञ्चालन गर्ने व्यवस्था गरिएको छ।
कर्णालीमा भेरी करिडोर पूर्ण बन्द
कर्णाली प्रदेशको रुकुम पश्चिमस्थित जाजरकोट–डोल्पा सडकखण्ड (भेरी करिडोर) पनि पहिरोका कारण पूर्ण रूपमा अवरुद्ध भएको छ। आठबीसकोट नगरपालिका–६, रिजेगाड खोलामा सडक माथिबाट ढुंगा, माटो तथा लेदोसहितको पहिरो खसेपछि सडक बन्द भएको प्रहरी सूचनामा उल्लेख छ।
नेपाल प्रहरीले वर्षाका कारण जोखिम बढेका सडकमा अनावश्यक यात्रा नगर्न तथा सडकको अवस्था बुझेर मात्र यात्रा गर्न आग्रह गरेको छ। अवरुद्ध सडक खुलाउने काम सम्बन्धित निकायको समन्वयमा भइरहेको जनाएको छ।
यात्रु तथा चालकले यात्रा गर्नुअघि सडकको पछिल्लो अवस्था बुझेर मात्रै गन्तव्यतर्फ जान प्रहरीले आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790835365.png)
-1786602170.png)
