काठमाडौं– त्रिशूली तथा नारायणी नदी किनारमा भेटिएका शवको संख्या बढ्दै गएपछि तिनको पहिचान र परीक्षणको जिम्मेवारी पोखरा केन्द्रित भएको छ। धादिङ, गोरखा, तनहुँ र पूर्वी नवलपरासीलगायत जिल्लामा भेटिएका १०२ शव व्यवस्थापन तथा परीक्षणका लागि पोखरा ल्याइएको हो।
भोटेकोशीले बगाएकाको खोजीका क्रममा विभिन्न जिल्लामा शव भेटिए पनि स्थानीयस्तरमै परीक्षण र व्यवस्थापन गर्ने पर्याप्त व्यवस्था नभएपछि ती शव पोखरा ल्याउनुपरेको कास्कीका सहायक प्रमुख जिल्ला अधिकारी चित्राङ्गद बरालले जानकारी दिए।
उनका अनुसार बिहीबार राति मात्रै पूर्वी नवलपरासीबाट ४१, तनहुँबाट २३, गोरखाबाट ११ र धादिङबाट २७ शव पोखरा ल्याइएको थियो। तीमध्ये अधिकांश शवको व्यवस्थापन पश्चिमाञ्चल क्षेत्रीय अस्पतालमा गरिएको छ।
तनहुँका विभिन्न स्थानमा भेटिएका नौ शव भने पोखरा स्वास्थ्य विज्ञान प्रतिष्ठानमा परीक्षणपछि मणिपाल शिक्षण अस्पताल पठाइएको छ।
पोखराका सरकारी तथा निजी अस्पतालमा गरी करिब ८८ शव व्यवस्थापन गर्न सकिने क्षमता रहेकामा एकैपटक ठूलो संख्यामा शव ल्याइएपछि प्रशासन र स्वास्थ्य संस्थामाथि व्यवस्थापनको थप दबाब परेको छ।
अब प्रशासनको प्राथमिकता शवको वैज्ञानिक परीक्षणसँगै पहिचान खुलाउनेतर्फ केन्द्रित छ। परीक्षणपछि पहिचान हुन नसकेका शवका विवरण सार्वजनिक सूचना जारी गरेर आफन्तसम्म पुर्याउने तयारी भइरहेको स्थानीय प्रशासनले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798392.jpg)
-1786602170.png)
-1786513116.png)
