काठमाडौं– तिब्बतबाट रसुवातर्फ आएको विनाशकारी बाढीमा परी घाइते भएका २६ जनालाई बिहीबार बिहानसम्म त्रिवि शिक्षण अस्पताल (टिचिङ) मा उपचारका लागि ल्याइएको छ ।
अस्पतालका अनुसार उपचारका क्रममा २५ वर्षीय एक पुरुषको मृत्यु भएको छ । अस्पतालमा ल्याइएका घाइतेमध्ये ६ जनाको आईसीयूमा उपचार भइरहेको छ ।
त्रिवि शिक्षण अस्पतालका प्रवक्ता डा. गोपाल सेढाईंका अनुसार बाढी प्रभावित क्षेत्रबाट थप ५० देखि ६० जना घाइते उपचारका लागि आउन सक्ने सूचना अस्पतालले प्राप्त गरेको छ ।
सम्भावित बिरामीको चापलाई ध्यानमा राख्दै अस्पतालले आवश्यक तयारीसमेत गरेको उनले बताए । उनका अनुसार थप आउने बिरामीमध्ये अत्यन्त गम्भीर अवस्थामा रहेका तथा आईसीयू आवश्यक पर्नेभन्दा सामान्य चोटपटक लागेका बिरामीको संख्या बढी हुन सक्ने अनुमान गरिएको छ ।
‘हामीले ५०–६० जना जति थप बिरामी आउन सक्ने अनुमान गरेका छौं । त्यहीअनुसार अस्पतालको तयारी गरेका छौं,’ प्रवक्ता डा. सेढाईंले बताए ।
सम्भावित बिरामीको चाप व्यवस्थापन गर्न अस्पतालले उपचार टोली तथा आवश्यक स्वास्थ्य सेवाहरू तयारी अवस्थामा राखेको जनाएको छ । आवश्यकताअनुसार थप जनशक्ति तथा उपचार व्यवस्थापन गर्ने तयारीसमेत गरिएको अस्पतालले जनाएको छ ।
तिब्बतबाट आएको विनाशकारी बाढीले रसुवा क्षेत्रमा ठूलो जनधनको क्षति पुर्याएको छ । बाढी प्रभावित क्षेत्रमा उद्धार तथा राहत कार्य जारी रहँदा घाइतेहरूलाई उपचारका लागि काठमाडौंलगायत विभिन्न स्थानका अस्पतालमा ल्याउने क्रम जारी छ ।
यसैबीच, बाढीपछि सम्पर्कविहीन भएका आफन्तको अवस्था बुझ्न तथा खोजी गर्न परिवारका सदस्यहरू अस्पतालसम्म पुग्न थालेका छन् । उद्धार गरिएका घाइतेको पहिचान तथा उपचार प्रक्रिया पनि सँगसँगै अघि बढाइएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
