काठमाडौं– रसुवा–नुवाकोट क्षेत्रमा थप ठूलो बाढी आउने कुनै विश्वसनीय सूचना प्राप्त नभएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणका अनुसार उक्त क्षेत्रमा वर्षा भइरहेकाले नदीको बहाव केही बढ्न सक्ने अवस्था छ। तर, हालसम्म थप ठूलो बाढीको जोखिम पुष्टि गर्ने कुनै आधिकारिक सूचना प्राप्त भएको छैन।
‘फेरि बाढी आउन लागेको भन्दै सूचना तथा फोन सम्पर्क प्राप्त भइरहेको छ। तर, अपुष्ट सूचना तथा हल्लाको पछि नलागी बाढीबाट प्रभावित स्थानभन्दा बाहिर सुरक्षित स्थानमा हुनुहुन्छ भने हाललाई थप ठूलो बाढी आउने सम्भावना नरहेको हुँदा अनावश्यक रूपमा नआत्तिनुहुन तथा संयमित रहनुहुन हार्दिक अनुरोध गर्दछौं,’ प्राधिकरणले भनेको छ।
प्राधिकरणले नागरिकलाई संयमित रहँदै आधिकारिक स्रोत तथा सम्बन्धित निकायबाट प्राप्त सूचनालाई मात्र आधार मान्न अनुरोध गरेको छ। साथै, आगामी समयमा नेपालतर्फ कुनै ठूलो बाढी प्रवेश गर्ने अवस्था देखिएमा सीमा क्षेत्रमा तैनाथ सुरक्षा निकाय तथा सम्बन्धित निकायसँग आवश्यक समन्वय गरी एसएमएसलगायत उपलब्ध विभिन्न सञ्चार माध्यममार्फत यथाशीघ्र आधिकारिक सूचना तथा पूर्वसूचना प्रवाह गरिने जनाएको छ।
सम्भावित जोखिमलाई ध्यानमा राख्दै नागरिकलाई आवश्यक सावधानी अपनाउन, सुरक्षित स्थानमा रहन तथा विपद्सम्बन्धी कुनै पनि सूचना प्राप्त गर्दा त्यसको आधिकारिकता पुष्टि गर्नसमेत प्राधिकरणले आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
