काठमाडौं –रसुवागढी भन्सार कार्यालयमा कार्यरत कर्मचारीमध्ये २५ जना सम्पर्कमा आएका छन् ।
अर्थ मन्त्रालयका अनुसार भन्सार प्रमुख राजेन्द्र ढुंगानासहित २५ जना सम्पर्कमा आएका हुन् ।
रसुवागढी भन्सारमा कुल ३६ स्थायी दरबन्दी थियो । बाँकी ११ जना स्थायी कर्मचारीसँग भने अहिलेसम्म सम्पर्क हुन सकेको छैन। उनीहरूको अवस्था बुझ्ने तथा सम्पर्क स्थापित गर्ने प्रयास भइरहेको छ।
भन्सार कार्यालयमा चार जना करार तथा ज्यालादारी कर्मचारी कार्यरत रहेकामा एक जना सम्पर्कमा आएका छन्। बाँकी तीन जनाको अवस्था पनि यकिन हुन सकेको छैन।
यसरी ११ स्थायी र तीन करार तथा ज्यालादारी गरी कुल १४ कर्मचारीको अवस्था बुझ्न खोजी तथा समन्वय भइरहेको छ।
सम्पर्क हुन नसकेका कर्मचारीलाई अहिलेकै अवस्थामा ‘बेपत्ता’ भन्न सकिने अवस्था नरहेकाले सम्बन्धित निकायले उनीहरूको खोजी र सम्पर्क स्थापनालाई प्राथमिकता दिएको छ।
बुधबार बिहान तिब्बततर्फबाट भोटेकोशीमा आएको आकस्मिक बाढीले टिमुरेस्थित रसुवागढी भन्सार क्षेत्रसमेत प्रभावित बनाएको छ। भन्सार कार्यालय, यार्ड तथा आसपासका पूर्वाधारमा क्षति पुगेको प्रारम्भिक विवरण आएको छ।
बाढीका कारण सडक, सञ्चार तथा अन्य पूर्वाधार प्रभावित भएकाले घटनास्थलको पूर्ण अवस्था र कर्मचारीको विवरण तत्काल यकिन गर्न कठिनाइ भइरहेको छ।
सम्बन्धित निकायले सम्पर्कमा आउन बाँकी कर्मचारीको खोजीसँगै उद्धार तथा अन्य निकायसँगको समन्वय जारी राखेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
