रसुवा– रसुवाको टिमुरेमा अचानक आएको ठूलो बाढीले बजार क्षेत्र नै बगाएको छ।
बाढी र लेदोसहित आएको भेलले प्रहरी चौकी, भन्सार कार्यालय, होटल, पसल तथा सडक किनारमा रहेका मालवाहक ट्रकसहितका सवारी साधनमा ठूलो क्षति पुर्याएको स्थानीय प्रत्यक्षदर्शीले बताएका छन्।
टिमुरेमा रहेका कपिल पाख्रिनका अनुसार करिब एक घण्टाअघि अचानक माथिल्लो क्षेत्रबाट हुरी, बादल, धुलो, धुवाँ र हिलोसहितको ठूलो भेल आएको थियो। बाढी एक्कासि आएको र आफूहरू ज्यान जोगाउन पहाडतर्फ भाग्न सफल भएको उनले बताए।
‘एक्कासि माथिबाट हुरी, बादल, धुलो, धुवाँ र हिलोसहित आयो। हामी त्यहीँ बसेको भए खोलामा मिसिन्थ्यौं। हामी माथि भित्तातिर, पहाडतिर भाग्न सफल भयौं। अहिले सुरक्षित छौं,’ उनले भने।
उनका अनुसार बाढीले टिमुरेमा रहेको प्रहरी चौकीसमेत बगाएको छ। भन्सार कार्यालयका भवनमा समेत क्षति पुगेको र खोला आसपासका होटल, पसल तथा पार्किङमा रहेका गाडी र मालवाहक ट्रकहरू बाढीले बगाएको उनले बताए।
‘सरकारी भवनहरू केही पनि छैनन्। टिमुरेमा रहेका वा खोला आसपासका सबै होटल, पसल, गाडी र मालवाहक ट्रकहरू केही पनि छैनन्,’ उनले भने। बाढीको बहाव अहिले भने केही घटेको छ। माथिल्लो डिलबाट हेर्दा खोला विस्तारै सामान्य अवस्थामा फर्किन थालेको उनको भनाइ छ।
उनका अनुसार बाढीसँगै आएको लेदो र पहिरोले बजार क्षेत्र तहसनहस बनाएको छ। बाढीले खोलाको धारसमेत परिवर्तन गरेको छ। पहिले बजार रहेको क्षेत्रमा अहिले खोला बगिरहेको उनले बताए।
‘लेदोले बगाएको छ। बाढीसँग आएको लेदोले सबै बगाएको छ। खोलाले आफ्नो धार परिवर्तन गरेको छ। जुन ठाउँमा बजार थियो, त्यो क्षेत्रमा अहिले खोला बगिरहेको छ,’ उनले भने।
बाढीको कारण भने अहिलेसम्म यकिन हुन सकेको छैन। स्थानीयले माथिल्लो क्षेत्रमा रहेको कुनै ताल फुटेको हुनसक्ने आशंका गरेका छन्। यद्यपि‚ यसको आधिकारिक पुष्टि भएको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
