काठमाडौं– सामान्य खोकीबाट सुरु भएको समस्या गम्भीर बन्दै गएपछि तीनवटा अस्पताल पुगेका ७ वर्षीय बालकको फोक्सोमा देखिएको समस्या अन्ततः श्वासनलीमा अड्किएको इमलीको दानाका कारण भएको खुलेको छ।
बाराको कलैयाका ती बालकलाई नर्भिक इन्टरनेशनल हस्पिटलमा ब्रोंकोस्कोपीमार्फत श्वासनलीमा अड्किएको इमलीको दाना निकालिएपछि स्वास्थ्यमा सुधार आएको छ।
शुक्रबार राति अचानक अत्यधिक खोकी लागेपछि बालकलाई सास फेर्न समस्या भएको थियो। खोकेपछि आँखा पल्टाएका उनी केहीबेरमै अर्धबेहोस अवस्थामा पुगे। परिवारले तत्काल कलैयास्थित सरकारी अस्पताल पुर्यायो।
अक्सिजन दिए पनि बालकको अक्सिजनको मात्रा ४०–५० आसपास मात्रै देखिएपछि भेन्टिलेटर आवश्यक रहेको भन्दै उनलाई अर्को अस्पतालमा रेफर गरियो। त्यसबेला बालक बोल्नसमेत नसक्ने अवस्थामा पुगिसकेका थिए।
कलैयाकै अर्को निजी अस्पतालमा भेन्टिलेटरमा राखेर उपचार सुरु गरिए पनि अपेक्षित सुधार आएन। छातीको एक्सरेमा फोक्सोको देब्रेतर्फको भाग सेतो देखिएपछि चिकित्सकहरूले कडा निमोनियाको आशंका गरे।
त्यहाँबाट उनलाई शनिबार साँझ वीरगञ्जको अर्को अस्पताल लगियो। आईसीयूमा राखेर उपचार सुरु गरेपछि बालक केही बोल्न सक्ने भए पनि फोक्सोको समस्या किन भइरहेको छ भन्ने यकिन हुन सकेन।
सिटीस्क्यानले खोल्यो वास्तविक कारण
आइतबारसम्म पनि फोक्सोको समस्या र निमोनियाको कारण स्पष्ट नभएपछि सिटीस्क्यान गरियो। त्यसपछि मात्रै बालकको देब्रेतर्फको श्वासनलीमा दानाजस्तो बाह्य वस्तु अड्किएको देखियो।
थप उपचारका लागि वीरगञ्जबाट काठमाडौं रेफर गरिएका बालकलाई चार घण्टासम्म अक्सिजन सपोर्ट दिएर काठमाडौं ल्याइएको थियो। आइतबार राति उनलाई नर्भिक इन्टरनेशनल हस्पिटलको आकस्मिक कक्षमा भर्ना गरिएको थियो।
गम्भीर अवस्थामा अस्पताल पुगेका बालकलाई तत्काल आईसीयूमा लगेर उपचार सुरु गरिएको थियो।
नर्भिकका सिनियर कन्सल्टेन्ट पल्मोनोलोजिस्ट तथा क्रिटिकल केयर स्पेसलिस्ट डा. अच्युतभक्त आचार्यको नेतृत्वमा रहेको चिकित्सक टोलीले सोमबार बिहान ब्रोंकोस्कोपी गरेर श्वासनलीमा अड्किएको इमलीको दाना निकालेको हो।
डा. आचार्यका अनुसार इमलीको दानाले देब्रेतर्फको श्वासनली पूर्णरूपमा बन्द गरिदिँदा फोक्सोको उक्त भागले काम गर्न छाडेको थियो।
“इमलीको दानाले श्वासनली बन्द हुँदा फोक्सोको देब्रे भागले काम गर्नै छाडेको र सेतो भइसकेको थियो। बालकलाई हाइफ्लो अक्सिजन सपोर्ट दिइएको थियो,” डा. आचार्यले भने, “दानापछि फोक्सोको अवस्थामा क्रमिक सुधार भइरहेको छ।”
बालकका बुबाका अनुसार शुक्रबारदेखि लगातार तीनवटा अस्पताल धाउँदासमेत वास्तविक समस्या पत्ता लागेको थिएन। काठमाडौं ल्याएर उपचार सुरु भएपछि मात्रै छोराको अवस्थामा उल्लेख्य सुधार आएको उनले बताए।
“शुक्रबारदेखि तीनवटा अस्पताल धायौं। बल्ल उपचार पाएपछि अहिले बाबु होशमा आइसकेको छ,” उनले भने, “अहिले बोल्न सक्ने भएको छ। अब त ठिक हुन्छ भन्ने आशा जागेको छ, बल्ल ढुक्क भएका छौं।”
अझ भावुक बनाउने अर्को कुरा उपचारपछि बालकले आफ्ना बुबालाई आफूले शुक्रबार दिउँसो इमली खाएको बताएका छन्। त्यसपछि उनले बुबालाई आफूलाई छिट्टै घर लैजान आग्रह गरेका थिए।
चिकित्सकका अनुसार श्वासनलीमा खानेकुरा वा अन्य वस्तु अड्किँदा तत्काल उपचार नपाए गम्भीर अवस्था निम्तिन सक्छ। बालकको हकमा पनि इमलीको दानाले श्वासनली अवरुद्ध गर्दा फोक्सोको एक भागले काम गर्न छाडेको थियो। समयमै सही कारण पहिचान गरी अड्किएको वस्तु निकालिएपछि भने उनको स्वास्थ्यमा सुधार देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
