काठमाडौं– इजरायलका प्रधानमन्त्री बेन्जामिन नेतन्याहूले इरानले आफ्नो परिवारलाई निशाना बनाएको दाबी गरेका छन्।
सोमबार सरकार समर्थक च्यानल–१४ लाई उनले दिएको टेलिफोन अन्तर्वार्तामा आफ्ना दुई छोरामध्ये एकको हत्या गर्ने प्रयास गरेको दाबी गरेका हुन्।
अन्तर्वार्तामा उनले आगामी निर्वाचनअघि आफ्नो परिवार र अन्य राजनीतिक नेताहरूको सुरक्षा व्यवस्थाबारे चर्चा गरेका थिए। ‘म र मेरो परिवारलाई दिइएको सुरक्षा कुनै विलासिता होइन,’ उनले भने।
उनका दुई छोरा याइर र अवनर हुन्। तर, उनले कुन छोरालाई निशाना बनाइएको थियो, घटना कहिले र कसरी भएको थियो भन्नेबारे विस्तृत जानकारी दिएनन्।
इजरायलमा नेतन्याहू परिवारका सदस्य तथा अन्य राजनीतिक नेताहरूलाई दिइँदै आएको सुरक्षा व्यवस्थालाई लिएर पछिल्ला केही महिनादेखि विवाद हुँदै आएको छ।
यसैबीच, इजरायलको आन्तरिक सुरक्षा निकाय शिन बेटले नेतन्याहूकी पत्नी सारा तथा उनका दुवै छोराको सुरक्षा बढाउने निर्णयलाई स्वीकृति दिएको छ। नेतन्याहू आगामी निर्वाचनमा पराजित भए पनि उनीहरूले सुरक्षा पाउने व्यवस्था गरिएको छ। इजरायलमा अर्को चुनाव करिब दुई महिनापछि हुँदैछ।
अवनर इजरायलमै बस्छन् भने याइर पछिल्ला केही वर्षदेखि अधिकांश समय अमेरिकाको मियामीमा बस्दै आएका छन्। याइर दक्षिणपन्थी धारका आफ्ना सार्वजनिक अभिव्यक्तिका कारण पनि चर्चित छन्।
एक रिपोर्टअनुसार याइरविरुद्ध कथित हत्या षड्यन्त्रबारे इजरायली सुरक्षा अधिकारीहरूलाई केही महिनाअघिदेखि नै जानकारी थियो। तर, सैन्य सेन्सरले त्यससम्बन्धी विवरण सार्वजनिक गर्न रोक लगाएको थियो।
परिवारको सुरक्षालाई लिएर किन विवाद?
इजरायलमा प्रधानमन्त्री र उनको परिवारलाई सुरक्षा प्रदान गर्ने व्यवस्था छ। तर, सारा नेतन्याहू तथा उनका छोराहरू याइर र अवनरलाई लामो समयसम्म सुरक्षा दिने निर्णय भएपछि यस विषयमा विवाद बढेको हो।
जुलाई २०२६ मा एक मन्त्रीस्तरीय समितिले नेतन्याहू र सारा नेतन्याहूलाई जीवनभर सुरक्षा दिने तथा दुवै छोरालाई कम्तीमा पाँच वर्ष सुरक्षा उपलब्ध गराउने निर्णय गरेको थियो।
आलोचकहरूले भने सुरक्षा अवधि यसरी पहिल्यै निश्चित गर्नु उचित नभएको तर्क गरेका छन्। उनीहरूका अनुसार सुरक्षा वास्तविक जोखिमको मूल्यांकनका आधारमा समय–समयमा समीक्षा गरिनुपर्छ।
सबैभन्दा बढी विवाद याइर नेतन्याहूलाई विदेशमा दिइएको सुरक्षालाई लिएर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
