काठमाडौं– पाकिस्तानका पूर्वप्रधानमन्त्री तथा पूर्व क्रिकेट कप्तान इमरान खानको स्वास्थ्य अवस्थालाई लिएर विश्वभरका पूर्व क्रिकेट कप्तानहरूले चासो व्यक्त गरेका छन् । २१ जना पूर्व अन्तर्राष्ट्रिय क्रिकेट कप्तानले पाकिस्तानी प्रधानमन्त्री शाहबाज सरिफलाई पत्र लेख्दै इमरानलाई उचित उपचार तथा मानवीय व्यवहारको सुनिश्चितता गर्न आग्रह गरेका छन् ।
अगस्ट २३ मा लेखिएको पत्रमा इमरानको स्वास्थ्य परीक्षण सर्वोच्च अदालतको आदेशअनुसार गर्न र उनको उपचारमा आवश्यक चिकित्सकीय प्रक्रिया पूरा गर्न माग गरिएको छ । पत्रमा भारतका तीन, अस्ट्रेलियाका आठ, इंग्ल्यान्डका छ, वेस्टइन्डिज र श्रीलंकाका एक–एक तथा न्युजिल्यान्डका दुई पूर्वकप्तान सहभागी छन् ।
यो इमरानको उपचारलाई लिएर पूर्व क्रिकेट कप्तानहरूले पाकिस्तानी सरकारलाई लेखेको दोस्रो पत्र हो । यसअघि करिब छ महिनाअघि १४ पूर्व अन्तर्राष्ट्रिय कप्तानले यस्तै आग्रहसहित पत्र पठाएका थिए । अहिले थप सात पूर्वकप्तानले साथ दिँदै पुनः सरकारको ध्यानाकर्षण गराएका हुन् ।
पत्रमा पूर्वकप्तानहरूले आफूहरूले राजनीतिक पक्षधरका रूपमा नभई क्रिकेट मैदानमा लामो समयसँगै खेलेका पूर्वसहकर्मीका रूपमा इमरानको स्वास्थ्यबारे चिन्ता व्यक्त गरेको उल्लेख गरेका छन् ।
उनीहरूले सर्वोच्च अदालतले इमरानको स्वास्थ्य परीक्षणका लागि गठन हुने मेडिकल बोर्डमा उनका निजी चिकित्सक र बहिनी डा. उज्मा खानलाई समेत सहभागी गराउन तथा परिवारसँग साप्ताहिक भेटको व्यवस्था गर्न आदेश दिएको दाबी गरेका छन् ।
तर राज्यद्वारा गठन गरिएको चिकित्सकीय टोलीले केही घण्टामै परीक्षण प्रक्रिया टुंग्याएर इमरानलाई स्वस्थ रहेको निष्कर्षसहित अदियाला जेल फर्काएको आरोप पत्रमा लगाइएको छ । इमरानको परिवार र कानुनी टोलीले पनि यसलाई अदालतको आदेशको उल्लंघन भएको दाबी गर्दै आएका छन् ।
पूर्व क्रिकेट कप्तानहरूले भने आफूहरू पाकिस्तानको न्यायिक प्रक्रियाबारे निर्णय सुनाउने पक्षमा नरहेको स्पष्ट पारेका छन् । उनीहरूले केवल अदालतको आदेशअनुसार गठित मेडिकल बोर्डलाई स्वतन्त्र र पूर्ण रूपमा स्वास्थ्य परीक्षण गर्न दिनुपर्ने माग गरेका छन् ।
बेलायतमा पनि इमरानको उपचारबारे दबाब
इमरान खानका पूर्व ससुरा पक्षका आफन्त तथा बेलायतको कन्जरभेटिभ पार्टीका सदस्य ज्याक गोल्डस्मिथले पनि बेलायतका विदेशमन्त्री एड मिलिब्यान्डलाई पत्र लेख्दै इमरानको उपचारका विषयमा पाकिस्तान सरकारसँग हस्तक्षेप गर्न आग्रह गरेका छन् ।
अगस्ट २१ मा लेखिएको पत्रमा गोल्डस्मिथले इमरानको स्वास्थ्य अवस्थालाई लिएर पाकिस्तानमाथि कूटनीतिक दबाब बढाउन आग्रह गरेका छन् । उनले इमरानको जीवन र स्वास्थ्यप्रति गम्भीर चिन्ता व्यक्त गर्दै तत्काल प्रभावकारी पहल आवश्यक रहेको बताएका छन् ।
बेलायती पक्षले यसअघि पनि पाकिस्तानले आधारभूत स्वतन्त्रता, जेलमा मानवीय व्यवहार तथा आवश्यक स्वास्थ्य उपचारको पहुँच सुनिश्चित गर्नुपर्ने बताउँदै आएको छ ।
उपचारलाई लिएर सरकार र पीटीआईबीच विवाद
इमरान खानको स्वास्थ्य र उपचारलाई लिएर पाकिस्तानको सत्तारूढ पक्ष र उनको पार्टी पाकिस्तान तेहरिक–ए–इन्साफ (पीटीआई) बीच लामो समयदेखि विवाद हुँदै आएको छ ।
पछिल्लो विवाद अदालतको आदेशअनुसार इमरानलाई निजी शिफा इन्टरनेसनल अस्पताल लैजानुपर्ने वा सरकारी पाकिस्तान इन्स्टिच्युट अफ मेडिकल साइन्सेस (पीआईएमएस) मा उपचार गर्ने भन्ने विषयमा केन्द्रित भएको छ । पीटीआई र सरकार दुवैले एकअर्कामाथि अदालतको आदेश उल्लंघन गरेको आरोप लगाउँदै आएका छन् ।
इमरानका कानुनी प्रतिनिधिहरूले उनको दाहिने आँखाको करिब ८५ प्रतिशत दृष्टि गुमेको दाबी गरेका छन् । उनीहरूले इमरानले सन् २०२५ को अक्टोबरदेखि आँखाको समस्याबारे गुनासो गर्दै आए पनि जेल प्रशासनले आवश्यक कदम नचालेको आरोप लगाएका छन् ।
इमरानको स्वास्थ्य अवस्थाबारे थप परीक्षणका लागि सर्वोच्च अदालतले मेडिकल बोर्ड गठन गर्न आदेश दिएको छ । बोर्डमा उनकी बहिनी डा. उज्मा खान र निजी चिकित्सकलाई समेत सहभागी गराउने व्यवस्था गरिएको बताइएको छ ।
बोर्डले इमरानको स्वास्थ्य परीक्षणसँगै पुराना मेडिकल रिपोर्टको अध्ययन गर्ने र उनको स्वास्थ्य समस्या, रगत जम्ने कारण तथा आवश्यक उपचारबारे सुझाव दिने अपेक्षा गरिएको छ । साथै उनलाई जेलमै उपचार गर्न सकिने अवस्था हो वा अस्पतालमा भर्ना गर्नुपर्ने हो भन्नेबारे पनि बोर्डले सिफारिस गर्नेछ ।
सन् २०२३ देखि जेलमा
७३ वर्षीय इमरान खान सन् २०२३ को अगस्टदेखि जेलमा छन् । तोशाखाना मुद्दामा तीन वर्षको सजाय सुनाइएपछि उनलाई पहिलोपटक पक्राउ गरिएको थियो । त्यसपछि साइफर, अल–कादिर ट्रस्ट र इद्दत निकाहलगायतका मुद्दामा पनि उनीविरुद्ध कारबाही अघि बढाइएको थियो ।
केही मुद्दामा अदालतबाट राहत पाए पनि अन्य मुद्दाका कारण उनी जेलमै छन् । इमरान खान र पीटीआईले आफूविरुद्धका मुद्दा राजनीतिक उद्देश्यबाट प्रेरित भएको दाबी गर्दै आएका छन् । सन् २०२२ मा प्रधानमन्त्री पदबाट हटेपछि आफूलाई राजनीति र निर्वाचनबाट टाढा राख्न कानुनी मुद्दा लगाइएको उनीहरूको आरोप छ ।
तर पाकिस्तान सरकार र अनुसन्धान निकायहरूले भने इमरानविरुद्धका मुद्दा कानुनी प्रक्रियाअनुसार अघि बढिरहेको भन्दै राजनीतिक प्रतिशोधको आरोप अस्वीकार गर्दै आएका छन् ।
पत्र लेख्ने पूर्व क्रिकेट कप्तानहरु
| क्र.सं. |
पूर्व कप्तान |
देश |
| १ |
कपिल देव |
भारत |
| २ |
सुनील गावस्कर |
भारत |
| ३ |
दिलीप भेङ्सरकर |
भारत |
| ४ |
स्टिभ व |
अस्ट्रेलिया |
| ५ |
एडम गिलक्रिस्ट |
अस्ट्रेलिया |
| ६ |
एलन बोर्डर |
अस्ट्रेलिया |
| ७ |
ग्रेग च्यापेल |
अस्ट्रेलिया |
| ८ |
इयान च्यापेल |
अस्ट्रेलिया |
| ९ |
बेलिन्डा क्लार्क |
अस्ट्रेलिया |
| १० |
एलेक्स ब्ल्याकवेल |
अस्ट्रेलिया |
| ११ |
किम ह्युज |
अस्ट्रेलिया |
| १२ |
एलिस्टर कुक |
इंग्ल्यान्ड |
| १३ |
नासिर हुसेन |
इंग्ल्यान्ड |
| १४ |
माइकल आथर्टन |
इंग्ल्यान्ड |
| १५ |
डेभिड गोवर |
इंग्ल्यान्ड |
| १६ |
एन्ड्र्यु स्ट्राउस |
इंग्ल्यान्ड |
| १७ |
माइकल ब्रिअर्ली |
इंग्ल्यान्ड |
| १८ |
क्लाइभ लोयड |
वेस्ट इन्डिज |
| १९ |
अर्जुना रणतुंगा |
श्रीलंका |
| २० |
जोन राइट |
न्युजिल्यान्ड |
| २१ |
ली जर्मन |
न्युजिल्यान्ड |
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
