काठमाडौं–सप्तरीको शम्भुनाथ नगरपालिका–३ मा दुई वर्षीया बालिकाको हत्या भएको घटनामा प्रहरीले उनकी सौतेनी आमालाई नियन्त्रणमा लिएर अनुसन्धान अघि बढाएको छ ।
मृतक बालिकाको पहिचान खुशी खातुनका रूपमा भएको छ । आइतबार घरबाट हराएको करिब दुई घण्टापछि उनी घरनजिकैको झाडीमा मृत अवस्थामा फेला परेकी थिइन् ।
बालिका हराएको खबर पाएपछि परिवार र स्थानीयले खोजी थालेका थिए । खोजीका क्रममा घर पछाडिको झाडीमा शव भेटिएपछि प्रहरीलाई खबर गरिएको थियो । प्रहरीले घटनास्थलको मुचुल्का उठाएर शव पोस्टमार्टमका लागि राजविराजस्थित गजेन्द्रनारायण सिंह अस्पताल पठाएको छ ।
प्रहरीले घटनाको अनुसन्धानका क्रममा १९ वर्षीया मुस्कान खातुनलाई पक्राउ गरेको छ । उनी मृतक बालिकाका बुवाकी कान्छी पत्नी हुन् । प्रहरीको प्रारम्भिक अनुसन्धानमा बालिकाको मृत्युमा मुस्कानको संलग्नता देखिएको जनाइएको छ ।
प्रहरीका अनुसार मृतकका बुवा मोहम्मद इरफान हाल वैदेशिक रोजगारीका क्रममा कतारमा छन् । इरफानकी जेठी पत्नी र उनकी छोरी पुर्ख्यौली घरमा बस्दै आएका थिए भने कान्छी पत्नी मुस्कान नजिकै छुट्टै डेरामा बस्दै आएकी थिइन् ।
स्थानीयका अनुसार दुई पत्नीबीच पारिवारिक विषयलाई लिएर पछिल्लो समय विवाद हुँदै आएको थियो । शनिबार पनि उनीहरूबीच विवाद भएको बताइएको छ । सम्पत्तिमा कसको अधिकार रहने भन्ने विषयलाई लिएर समेत विवाद हुने गरेको स्थानीयको भनाइ छ ।
घटनापछि आक्रोशित स्थानीयले बालिकाको हत्या छानबिन गरी दोषीमाथि कडा कारबाहीको माग गर्दै रुपनी बजारमा केही समय प्रदर्शन गरेका थिए । विरोधका कारण केहीबेर बजार तथा राजमार्ग क्षेत्रमा अवरोधसमेत भएको थियो ।
हाल रुपनी बजार र राजमार्गको अवरोध हटिसकेको प्रहरीले जनाएको छ । घटनाको थप अनुसन्धान भइरहेको छ भने पोस्टमार्टम रिपोर्ट आएपछि मृत्युको कारणबारे थप स्पष्ट हुने प्रहरीले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
