काठमाडौं– त्रिभुवन अन्तर्राष्ट्रिय विमानस्थलबाट पेटभित्र सुनजस्तो देखिने धातुका क्याप्सुल लुकाएर ल्याएका एक बंगलादेशी नागरिक पक्राउ परेका छन्।
त्रिभुवन अन्तर्राष्ट्रिय विमानस्थल सुरक्षा कार्यालयका अनुसार फ्लाई दुबईको FZ1133 उडानमार्फत दुबईबाट काठमाडौं आएका ३५ वर्षीय बंगलादेशी नागरिक मोहम्मद रसिल हल्दार पक्राउ परेका हुन् ।
उनी साउन ३१ गते बिहान १०:३० बजे दुबईबाट काठमाडौं आएका थिए। विमानस्थलको अन्तर्राष्ट्रिय आगमनतर्फ रहेको भन्सार एरिया क्रस गरी पार्किङ एरियातर्फ जाँदै गर्दा सादा पोसाकमा खटिएका प्रहरी कर्मचारीले शंका लागेर उनलाई नियन्त्रणमा लिई सोधपुछ गरेका थिए।
सोधपुछका क्रममा उनले आफूले करिब १५० ग्राम अर्थात १२ तोला १३ आना बढी सुन लुकाएर ल्याएको स्वीकार गरेपछि उनलाई काठमाडौं मेडिकल कलेज, सिनामंगल लगिएको थियो। अस्पतालमा उनको पेल्भिक एरियाको एक्स–रे गर्दा पेटभित्र शंकास्पद धातु देखिएको थियो।
एक्स–रेमा वस्तु देखिएपछि तत्काल शौच गराउँदा उक्त वस्तु ननिस्किएर पेटमै अड्किएको पाइएको प्रहरीको भनाइ छ। त्यसक्रममा उनको स्वास्थ्यमा भने कुनै प्रतिकूलता नदेखिएको जनाइएको छ।
आवश्यक कानुनी प्रक्रिया पूरा गरी उनलाई ५ दिन निजलाई अस्पतालमा भर्ना गरी राखिएको थियो। अस्पतालमा रहँदा भदौ ५ गते शौच गर्दा अनुमानित १५० ग्राम तौल भएको सुनजस्तो देखिने पहिलो क्याप्सुल आकारको धातुका २ वटा बाहिर परेको प्रहरीले जनाएको छ।
बरामद धातु सुन हो वा होइन भन्ने विषयमा आवश्यक अनुसन्धान तथा परीक्षणको प्रक्रिया अघि बढाइएको छ।
पक्राउ परेका बंगलादेशी नागरिक मोहम्मद रासेल हलदारलाई आवश्यक अनुसन्धान तथा प्रचलित कानुनबमोजिम कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालय, गौचरमा बुझाइएको विमानस्थल सुरक्षा कार्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
